नागपूर ते शिर्डी हा समृद्धी महामार्गाचे पंतप्रधान नरेंद्र मोदी यांच्या हस्ते उदघाटन करण्यात आले. या महामार्गासोबतच मुंबई ते शिर्डी अशी वंदे भारत एक्सप्रेसही सुरू करण्यात आली. या दोन प्रवास मार्गांनंतर आता विमान प्रवासाबाबतीत महत्वाची बातमी हाती येतेय. शिर्डी विमानतळावर आता रात्रीच्या वेळीही विमानाचं लँडिंग आणि टेकऑफ होणार आहे.

शिर्डीत दर्शनाला जाणार्‍या साईभक्तांसाठी ही आनंदाची बातमी आहे. उपमुख्यमंत्री देवेंद्र फडणवीस यांनी शिर्डी विमानतळावर नाईट लँडिंगची परवानगी मिळावी, यासाठी सातत्याने पाठपुरावा केला होता. त्यालाच आता यश मिळाले आहे.

गुरुवारी सकाळीच डीजीसीएकडून याबाबतचा परवाना प्राप्त झाला असून उपमुख्यमंत्री देवेंद्र फडणवीस यांनी याबद्दल पंतप्रधान नरेंद्र मोदी आणि नागरी उड्डयण मंत्री ज्योतिरादित्य शिंदे यांचे आभार मानले आहेत.

नाईट लँडिंगचा परवाना प्राप्त झाल्यामुळे शिर्डी यात्रा तर सुलभ होईलच. शिवाय, या परिसराच्या विकासाला सुद्धा गती प्राप्त होणार आहे. भाविकांच्या संख्येत सुद्धा मोठी वाढ अपेक्षित असून त्यामुळे येथील अर्थकारणाला गती प्राप्त होणार आहे.

नागपूर ते शिर्डी हा समृद्धी महामार्ग पंतप्रधान नरेंद्र मोदी यांच्या हस्ते खुला झाला होता. त्यापाठोपाठ मुंबई ते शिर्डी अशी वंदे भारत एक्सप्रेस सुरू झाली होती. त्यानंतर आता नाईट लँडिंगची सवलत प्राप्त झाल्याने पहाटेच्या काकड आरतीला उपस्थित राहू इच्छिणार्‍यांना रात्री प्रवास करुन येता येणार आहे. एकूणच भाविकांना मोठ्या सुविधा यामुळे निर्माण होणार आहेत.