मुंबई : मुंबईतील कांदिवली पश्चिम उपनगरात शनिवारी सायंकाळी घर कोसळून एका चार वर्षाच्या चिमुकल्याचा मृत्यू झाला, तर एका लहान मुलासह पाच जण जखमी झाले आहेत. बृहन्मुंबई महानगरपालिकेच्या (BMC) अधिकाऱ्याने ही माहिती दिली.

अधिकाऱ्यांनी दिलेल्या माहितीनुसार, लालजी पाडा परिसरातील केडी कंपाऊंडमध्ये दुपारी चारच्या सुमारास हा अपघात झाला. या भागातील बीएमसीचा दुरुस्ती विभाग आर-दक्षिण प्रभागातील रस्त्याशी संबंधित काम करत आहे. (Four years old boy dies after house collapse in Mumbai)

मिळालेल्या माहितीनुसार, नौशाद अली (4) याला अपघातानंतर रुग्णालयात नेण्यात आले, तिथे त्याला मृत घोषित करण्यात आले. या अपघातात हसीना शहा (22), शहीदुनिसा रैन (30), प्रेम यादव (38), मोहम्मद अन्सार (16) आणि तीन महिन्यांचा दिलशाद शहा हे जखमी झाल्याचे त्यांनी सांगितले. दिलशाद वगळता सर्व जखमींची प्रकृती स्थिर असल्याचे सांगण्यात येत आहे.