Kolhapur: विकेंडला गेलेल्या चार तरुणींचा धबधब्यात बुडून मृत्यू झाला आहे. बेळगाव व चंदगड सीमेवरील चंदगड (Chandgarh) तालुक्यातील किटवाड येथे आज (दि.26) सकाळी साडे अकराच्या सुमारास ही घटना घडली. किटवाड लघुपाटबंधारे धरणाच्या धबधब्याच्या ठिकाणी खोल खड्ड्यात पडल्याने चार तरुणींचा मृत्यू (Kolhapur Drowning) झाला आहे. तर एका तरुणीला वाचवण्यात यश आले.

असिया मुजावर (वय 17), कुदासिया पटेल (वय 20), रुक्षार बिस्ती (वय 20), तस्मिया (वय 20) असे मृत चार तरुणींची नावे आहेत. 12 फूट खोल असलेल्या या खड्ड्यात तरुणी आंघोळीसाठी पाण्यात उतरल्या होत्या. 40 महाविद्यालयीन तरुणी पर्यटनासाठी याठिकाणी आल्या होत्या अशी माहिती मिळत आहे.

मिळालेल्या माहितीनुसार, किटवाड येथे लघुपाटबंधारे विभागाची दोन धरणे आहेत. एक क्रमाकांच्या धरणावर ही घटना घडली असून, याठिकाणी 12 फूट खोल खड्डा आहे. पहिली तरुणी खड्ड्यात पडल्याने दुसरी तिला वाचवण्यासाठी गेली. त्यानंतर तिसरी, चौथी व त्यापाठोपाठ पाच तरूणी खड्ड्यात पडल्या. पाचही बुडाल्या त्यापैकी चार जणींचा जागीच मृत्यू झाला, तर एकीच प्रकृती गंभीर आहे. उपचारासाठी तिला बेळगाव येथील एका रुग्णालयात दाखल करण्यात आले.