शिवसेनेचे नेते आणि राज्याचे परिवहन मंत्री अनिल परब (Anil Parab) यांच्या मालमत्त्यांवर सकाळी ईडीकडून धाड टाकण्यात आली आहे. मिळालेल्या माहितीनुसार, अनिल परब यांच्या संबंधित अशा एकूण सात ठिकाणी ईडीकडून धाडसत्र सुरू करण्यात आले. (ED action against Maharashtra Transport Minister Anil Parab)

तसेच अनिल परब यांच्या शासकीय निवासस्थानी ईडीची धाड पडली आहे. त्यासोबतच वांद्रे येथील त्यांच्या निवासस्थानीही ईडीकडून छापेमारी सुरू करण्यात आली आहे असे वृत्त समोर येत आहे.

किरीट सोमय्या यांनी केंद्रात अनिल परब यांच्याविरोधात तक्रार दाखल केली होती. सचिन वाझे तसेच 100 कोटींच्या प्रकरणातही अनिल परब यांचे नाव याआधी समोर आले होत. परबांचे पार्टनर संजय कदम यांच्या घरातूनही ईडीला मोठं घबाड हाती लागलं होतं. मनी लॉंडरिंग प्रकरणातील ईडीच्या या कारवाईनंतर परब यांच्या अडचणीत आणखी वाढ झाली आहे.

अनिल परब यांच्या दापोली रिसॉर्टवर देखील छापेमारीचे सत्र सुरू झाले आहे. सध्या महाराष्ट्र राज्यसभेच्या जागेवरून शिवसेना जोरदार चर्चेत आली आहे. संभाजीराजेंना शिवसेनेने मतदान करण्यास नकार दिल्यानंतर आज संजय राऊत आणि संजय पवार राज्यसभेसाठी अर्ज दाखल करतील. त्याआधीच ही कारवाई झाल्याचं पाहायला मिळत आहे.

अनिल देशमुख यांच्या 100 कोटींच्या वसुली प्रकरणात ईडीकडून ही छापेमारी सुरू असल्याचे बोलले जात आहे. पोलीस खात्यात बदल्यांचं रॅकेट अनिल परब यांच्यामार्फत सुरू असल्याचा संशय यंत्रणांना आला आहे. याआधी किरीट सोमय्या यांनी परबांवर परिवहन खात्यात पैशांची अफरातफर केल्याचा देखील आरोप केला होता. सोबत अनधिकृत रिसॉर्ट प्रकरणातही परबांचा पाय खोलात गेला आहे.

तसेच अनिल परब यांच्यावर सुमारे 50 कंत्राटदारांकडून कोट्यवधी रुपयांची वसुली केल्याचाही आरोप करण्यात आला आहे. या प्रकरणात गैरव्यवहार झाल्याचा संशय यंत्रणांना आला आहे. त्यातूनच या कारवाईला सुरुवात झाली आहे.