दोडामार्ग: नाताळच्या सुट्ट्यांचा आनंद घेण्यासाठी गोव्याकडे जाणाऱ्या पर्यटकांच्या ओघ वाढला आहे. मात्र, याच प्रवासादरम्यान दोडामार्ग तालुक्यातील 'केळीचे टेंब' येथे शनिवारी सकाळी एका पर्यटकांच्या कारचा अपघात झाला. सुदैवाने, या अपघातात कोणतीही जीवितहानी झाली नसून कारमधील सर्व प्रवासी सुखरूप बचावले आहेत.

मिळालेल्या माहितीनुसार, बेंगलोर येथील हे पर्यटक आपल्या खाजगी कारने गोव्याला फिरायला निघाले होते. शुक्रवारी रात्री त्यांनी बेळगाव येथे मुक्काम केला आणि शनिवारी पहाटे ते दोडामार्ग मार्गे गोव्याच्या दिशेने मार्गस्थ झाले. निसर्गरम्य कोकण आणि गोव्याच्या ओढीने निघालेल्या या पर्यटकांचा प्रवास सुरळीत सुरू होता, मात्र दोडामार्ग जवळील घाटात ही घटना घडली.

नेमका अपघात कसा झाला?

हा अपघात कोणत्याही तांत्रिक बिघाडामुळे किंवा वेगामुळे झाला नसून, कारमधील एका लहान मुलीच्या हालचालीमुळे घडला. कारमध्ये मागे बसलेली एक चार वर्षांची चिमुरडी चालकाच्या शेजारील सीटवर बसलेल्या आपल्या वडिलांकडे जाण्यासाठी धडपड करत होती.

मुलीला पकडण्याच्या नादात आणि तिच्या या गोंधळामुळे चालकाचे लक्ष अवघ्या काही सेकंदांसाठी विचलित झाले. याच क्षणी चालकाचा ताबा सुटला आणि कार मुख्य रस्त्यावरून खाली घळणीत (खड्ड्यात) उतरली.

कारचे मोठं नुकसान

रस्त्यावरून खाली उतरलेली कार वेगाने समोर असलेल्या एका मोठ्या झाडाकडे जात होती. मात्र, चालकाने प्रसंगावधान राखल्याने कार झाडाला आदळता आदळता थोडक्यात बचावली. जरी कारचे मोठे नुकसान झाले असले, पर्यटकांना गंभीर इजा झाली नाही. अपघातानंतर स्थानिक नागरिकांनी तातडीने मदतीसाठी धाव घेतली आणि प्रवाशांना सुखरूप बाहेर काढले.