Banda Check Post : उपप्रादेशिक परिवहन कार्यालयाचा बांदा-सटमटवाडी येथील गेली 15 वर्षे वादाच्या भोवऱ्यात असलेला अत्याधुनिक सीमा तपासणी नाका शनिवार (ता.1) पासून होणार असल्याची माहिती उपप्रादेशिक परिवहन अधिकारी नंदकिशोर काळे यांनी आज ‘गोमन्तक’ला दिली.

यामुळे गोव्यातून महाराष्ट्रात अर्थात सिंधुदुर्गात प्रवेश करणाऱ्या प्रत्येक वाहनाचे डिजिटल स्कॅनिंग होणार आहे. त्याने गोव्यातून होणाऱ्या बेकायदा दारू वाहतुकीसह अवैध धंद्यांना चाप बसणार आहे.

अनेक वर्षे विविध कारणांनी नाका वादात होता. यंदाच्या गणेश चतुर्थीला नाका सुरू करण्याच्या हालचाली होत्या. मात्र, त्यानंतर दिवाळीचा मुहूर्त ठरला. सर्व कामे जलदगतीने पूर्ण केली.

नाक्यावर प्रशासकीय तांत्रिक बाबींसह प्रवाशांसाठी सुविधा आहेत. राज्य सीमा सुरक्षिततेसाठी शासनाने अत्याधुनिक 22 तपासणी नाके उभारण्याचा निर्णय घेतला होता.