महाराष्ट्रातील राजकारण मागील काही दिवसांपासून चांगलचं गाजत आहे. यातच महाविकास आघाडीमधील मंत्री आणि राष्ट्रवादी कॉंग्रेसचे नेते नवाब मलिक (Nawab Malik) यांची ईडी कोठडीत रवानगी झाल्यानंतर राज्यातील राजकीय वातावरण अधिकच गढूळ बनलं. याच पाश्वभूमीवर आता शिवसेनेचे पदाधिकारी आणि शिर्डी ट्रस्टचे सदस्य राहुल कनाल (Rahul Kanal) यांच्या ठिकाणांवर मंगळवारी आयकर विभागाने छापा टाकला आहे. राहुल कनाल हे आदित्य ठाकरे (Aditya Thackeray) यांचे निकटवर्तीय मानले जातात. (Aditya Thackeray's close confidante Rahul Kanal has been raided by the Income Tax Department)

दरम्यान, आयकर छाप्यांबाबत आदित्य ठाकरे म्हणाले की, 'महाराष्ट्रावर असे हल्ले यापूर्वीही झाले आहेत. आणि आताही होत आहेत. यापूर्वी केंद्रीय यंत्रणांचा अशा प्रकारे गैरवापर बंगाल, आंध्र प्रदेशात झाला आहे. आणि आता महाराष्ट्रातही महानगरपालिका निवडणुकींच्या पाश्वभूमीवर धाडसत्र सुरु झाले आहे. या केंद्रीय एजन्सी एक प्रकारे भाजपचीच प्रचार यंत्रणा बनल्या आहेत, पण आम्ही झुकणार नाही, महाराष्ट्र झुकणार नाही.'

तसेच, गेल्या महिन्यात शिवसेनेचे नगरसेवक यशवंत जाधव यांच्या मुंबईतील ठिकाणांवर करचुकवेगिरीच्या आरोपावरुन आयकर विभागाने छापा टाकला होता. जाधव यांच्या पत्नी यामिनी जाधव या भायखळा मतदारसंघातून आमदार आहेत. जाधव हे बृहन्मुंबई महानगरपालिकेत आर्थिक बाबीसंबंधीच्या समितीचे प्रमुख आहेत. महाराष्ट्र सरकारला अस्थिर करण्यासाठी केंद्रीय यंत्रणांकडून महाविकास आघाडीमधील नेत्यांना लक्ष्य केले जात असल्याचा आरोप शिवसेना (Shiv Sena) आणि राष्ट्रवादी काँग्रेसने केला आहे. केंद्रीय अर्थमंत्री निर्मला सीतारामन यांनी हे आरोप निराधार असल्याचे म्हणत फेटाळून लावले होते.

शिवाय, महाराष्ट्रात शिवसेनेच्या नेतृत्वाखाली महाविकास आघाडीचे सरकार स्थापन झाल्यापासून राजकीय उलथापालथ झाली आहे. यापूर्वी केंद्रीय मंत्री नारायण राणे आणि त्यांचा मुलगा नितेश राणे यांनाही विविध प्रकरणात अटक करण्यात आली आहे. तर शिवसेना आणि राष्ट्रवादीच्या काही नेत्यांची विविध प्रकरणांमध्ये अंमलबजावणी संचालनालयाकडून चौकशी करण्यात आली आहे.