Khed- Ratnagiri Crime News

खेड : महाराष्ट्रातील रत्नागिरी जिल्ह्यातील खेड तालुक्यात गुरुवारी धक्कादायक घटना उघडकीस आली. खेडच्या भोस्ते घाटात एका पुरुषाचा सापळा आणि कवटी आढळल्याने अनेकांनी भुवया उंचावल्या आहेत, मात्र हा प्रकार इथेच थांबत नाही.

एका माणसाने हाच मृतदेह स्वप्नात दिसल्याचा दावा केला होता आणि पोलिसांनी खरोखर घटनास्थळी जाऊन पाहिल्यानंतर अगदी तसाच मृतदेह सापडला आहे. 'रात्री पडलेल्या स्वप्नाचा' उल्लेख चक्क पोलिसांच्या एफआयआरमध्येही करण्यात आला आहे.

सिंधुदुर्गातील सावंतवाडीत राहणाऱ्या योगेश आर्या (वय ३० वर्षे) या तरुणाला दोन दिवसांपूर्वी स्वप्नात एक मृतदेह दिसला होता. योगेशने याची माहिती पोलिसांनी दिली. सुरूवातीला पोलिसांनी विश्वास ठेवला नाही, शेवटी योगेशच्या आग्रहाखातर पोलिसांनी घटनास्थळाची पाहणी करण्याचे ठरवले.

भोस्ते घाटातील एका झाडाजवळ पोलिसांना वास येत होता. पोलिसांनी परिसरात कसून शोध घेतला असता एक प्रेत पडलेले दिसले. फादींला गळफास घेतलेल्या अवस्थेत तो मृतदेह होता. तिथून पुढे काही अंतरावर एक कवटी देखील होती.

घटना बऱ्याच महिन्यांपूर्वीची असावी, निर्जन परिसर असल्याने तिथे कोणी पोहोचू शकले नाही आणि मृतदेह कुजला असावा, असा प्राथमिक अंदाज वर्तवला जात आहे. मृतदेह कोणाचा आहे, ही आत्महत्या आहे की हत्या याचा पोलीस तपास करत आहे. मात्र, एफआयआरमधील स्वप्नाचा उल्लेख याची सध्या कोकणात सर्वत्र चर्चा सुरू आहे.