WPL Auction 2023: वूमन्स प्रीमियर लीगच्या (WPL) पहिल्या हंगामासाठी खेळाडूंचा लिलाव मुंबईत होत आहे. या लिलावात अनेक स्टार खेळाडूंना कोट्यवधींची बोली लागली आहे. यात भारतीय क्रिकेटपटूंबरोबरच परदेशी खेळाडूंचाही समावेश आहे. ऑस्ट्रेलियाची स्टार क्रिकेटपटू ऍश्ले गार्डनरचाही यात समावेश आहे.

ऍश्ले गार्डनर या लिलालात 3 कोटींपेक्षाही अधिकची बोली लागलेली स्मृती मानधनानंतरची दुसरीच खेळाडू ठरली. 25 वर्षीय अष्टपैलू ऍश्ले गार्डनरसाठी गुजरात जायंट्स, मुंबई इंडियन्स आणि युपी वॉरियर्स यांच्यात चुरस झाली. पण अखेर अहमदाबादच्या फ्रँचायझीने म्हणजेच गुजरात जायंट्सने तिच्यासाठी 3 कोटी 20 लाख रुपये मोजले आणि तिला संघात सामील करून घेतले.

गार्डनरने नुकतेच महिला टी20 वर्ल्डकप 2023 स्पर्धेतील ऑस्ट्रेलियाच्या पहिल्याच सामन्यात न्यूझीलंडविरुद्ध 12 धावांत 5 विकेट्स घेण्याची कामगिरी केली होती. हे तिचे आंतरराष्ट्रीय टी20 कारकिर्दीतील सर्वोत्तम प्रदर्शनही ठरले.

तिने यापूर्वी दोनवेळा ऑस्ट्रेलियन संघासह टी20 वर्ल्डकपही जिंकली आहे. तिच्याकडे फिरकी गोलंदाजीबरोबर फलंदाजीत चांगले योगदान देण्याचीही क्षमता आहे. तिने ऑस्ट्रेलियन क्रिकेट बोर्डाकडून दिला जाणारा सर्वोत्तम महिला आंतरराष्ट्रीय क्रिकेटपटूचा 2021-22 वर्षातील पुरस्कारही जिंकला होता.

ती सध्या आंतरराष्ट्रीय टी20 क्रमवारीत अष्टपैलू खेळाडूंच्या यादीत अव्वल क्रमांकावर आहे. तसेच तिने महिला बिग बॅश लीगच्या आठव्या हंगामातील सर्वोत्तम खेळाडूचा पुरस्कारही जिंकला होता.

गार्डनरने आत्तापर्यंत 68 आंतरराष्ट्रीय टी20 सामने खेळले असून 1069 धावा केल्या आहेत. तसेच 48 विकेट्स घेतल्या आहेत. त्याचबरोबर 52 वनडे सामने खेळले असून 686 धावा केल्या असून 58 विकेट्स घेतल्या आहेत. याशिवाय तिने 3 कसोटी सामने खेळले असून 157 धावा केल्या आहेत आणि 4 विकेट्स घेतल्या आहेत.