Goa Chess Player Ethan Vaz : गोव्याचा युवा बुद्धिबळपटू एथन वाझ याला झटपट बुद्धिबळातील ब्लिट्झ प्रकारात जगात अव्वल स्थान मिळाले आहे. जागतिक बुद्धिबळ महासंघाच्या (फिडे) 12 वर्षांखालील खुल्या मानांकनात एथन जगात पहिल्या स्थानी आहे.

फिडेच्या ताज्या मानांकनानुसार, फिडे मास्टर किताबधारक एथनचे ब्लिट्झ प्रकारातील 12 वर्षांखालील खुल्या गटात सर्वाधिक २३७१ एलो गुण आहेत. १२ वर्षीय एथनचे स्टँडर्ड प्रकारात २३०६ एलो गुण, तर रॅपिड प्रकारात २१४७ एलो गुण आहेत.

१२ वर्षांखालील वयोगटात भारताचाच रोश जैन जगात दुसऱ्या स्थानी आहे. त्याचे ब्लिट्झ प्रकारात २२३३ गुण असून तिसऱ्या स्थानी असलेल्या जर्मनीच्या ख्रिस्तियन ग्लोएक्लर याचे २२३२ एलो गुण आहेत.

सबज्युनियर (१५ वर्षांखालील वयोगट) खुल्या गटातील ब्लिट्झ प्रकारातही एथनने भारतीय खेळाडूंना अग्रस्थान मिळविले आहे.