India Squad for first Two Test against England:

इंग्लंडचा क्रिकेट संघ लवकरच भारत दौऱ्यावर येणार आहे. या दौऱ्यात इंग्लंडला भारताविरुद्ध 5 सामन्यांची कसोटी मालिका खेळायची आहे. या कसोटी मालिकेला 25 जानेवारीपासून सुरुवात होणार आहे. या मालिकेतील पहिल्या दोन कसोटी सामन्यांसाठी शुक्रवारी (12 जानेवारी) रात्री बीसीसीआयने भारतीय संघाची घोषणा केली.

पहिल्या दोन कसोटीसाठी निवडण्यात आलेल्या भारतीय संघात वेगवान गोलंदाज मोहम्मद शमी आणि प्रसिध कृष्णा यांचा समावेश करण्यात आलेला नाही. कृष्णाने काही दिवसांपूर्वीच दक्षिण आफ्रिका दौऱ्यात कसोटीमध्ये पदार्पण केले होते.

दरम्यान, मीडियातील अनेक रिपोर्ट्सनुसार शमी अद्याप दुखापतीतून सावरलेला नाही. वनडे वर्ल्डकप 2023 नंतर शमी स्पर्धात्मक क्रिकेट खेळलेला नाही, तो सध्या घोट्याच्या दुखापतीतून सावरण्याचा प्रयत्न करत आहे. त्याचमुळे त्याला खेळवण्याची घाई बीसीसीआयने केलेली नाही.

याशिवाय प्रसिध कृष्णा शुक्रवारी कर्नाटककडून गुजरातविरुद्ध रणजी ट्रॉफीचा सामना खेळत असताना दुखापतग्रस्त झाला. पीटीआयने दिलेल्या वृत्तानुसार या सामन्याच्या पहिल्याच दिवशी त्याला मांडीची दुखापत झाली आहे. त्याने 14.5 षटके गोलंदाजी केली.

मात्र, त्यानंतर त्याला गोलंदाजी करता आली नाही. या दुखापतीतून सावरण्यासाठी त्याला 4 ते 6 आठवड्यांचा कालावधी लागू शकतो. त्यामुळे त्यालाही इंग्लंडविरुद्धच्या पहिल्या दोन्ही सामन्यासाठी संधी देण्यात आली नसल्याचे म्हटले जात आहे.

तथापि, ईशान किशनलाही इंग्लंडविरुद्धच्या कसोटी मालिकेतील पहिल्या दोन सामन्यासाठी भारतीय संघात संधी देण्यात आलेली नाही. मात्र, यामागील ठोस कारण अद्याप समोर आलेले नाही. मात्र, काही दिवसांपूर्वी प्रशिक्षक राहुल द्रविडने म्हटले होते की ईशानने देशांतर्गत क्रिकेटमध्ये खेळून तो निवडीसाठी उपलब्ध असल्याचे दाखवावे.

ईशानऐवजी भारतीय संघात ध्रुव जुरेलला संधी देण्यात आली आहे. त्यामुळे भारताच्या कसोटी संघात सध्या जुरेलसह केएल राहुल आणि केएल भरत हे दोघेही यष्टीरक्षक म्हणून पर्याय आहेत.

इंग्लंडविरुद्धच्या पहिल्या दोन कसोटीसाठी भारतीय संघ -

• रोहित शर्मा, शुभमन गिल, यशस्वी जयस्वाल, विराट कोहली, श्रेयस अय्यर, केएल राहुल (यष्टीरक्षक), केएस भरत (यष्टीरक्षक), ध्रुव जुरेल (यष्टीरक्षक), आर अश्विन, रविंद्र जडेजा, अक्षर पटेल, कुलदीप यादव, मोहम्मद सिराज, मुकेश कुमार, जसप्रीत बुमराह (उपकर्णधार), आवेश खान.