ICC ODI Cricket World Cup 2023, India vs New Zealand, Virat Kohli 50th ODI Century:

वनडे वर्ल्डकप 2023 स्पर्धेच्या अंतिम सामन्यात भारतीय क्रिकेट संघाने दणक्यात प्रवेश मिळवला आहे. बुधवारी वानखेडे स्टेडियमवर या स्पर्धेतील पहिला उपांत्य सामना भारत आणि न्यूझीलंड संघात रंगला. या सामन्यात भारताने 70 धावांनी विजय मिळवला. भारताच्या या विजयात स्टार फलंदाज विराट कोहलीचेही मोठे योगदान राहिले.

विराटने या सामन्यात 113 चेंडूत 117 धावांची खेळी केली. या खेळीत त्याने 9 चौकार आणि 2 षटकार मारले. विराट कोहलीच्या वनडे कारकिर्दीतील हे 50 वे शतक होते. त्यामुळे तो वनडेत 50 शतके ठोकणारा पहिलाच क्रिकेटपटू ठरला. त्याने सचिन तेंडुलकरचा ४९ शतकांचा विक्रम मोडित काढला.

महत्त्वाच्या म्हणजे यावेळी वानखेडे स्टेडियमवर सचिन तेंडुलकरही उपस्थित होता. त्यामुळे विराट 50 वे शतक पूर्ण झाल्यानंतर त्याच्यासमोर नतमस्तकही झाला.

दरम्यान, 50 वे वनडे शतक झाल्यानंतर विराटने स्वप्नपूर्तीचा हा क्षण असल्याचे म्हटले. तो म्हणाला, 'मी कोलकातामध्येच म्हटले होते की दिग्गज सचिन तेंडुलकरने माझे अभिनंदन केले होते. हे सर्व स्वप्नासारखे वाटत आहे, जे पूर्ण झाले आहे. माझ्यासाठी ही खूप अविश्वसनीय भावना आहे.'

'आज एक मोठा सामना होता, मला माझी जबाबदारी पार पाडायची होती, जशी मी संपूर्ण स्पर्धेत पार पाडली होती. त्यामुळे माझ्या आजूबाजूला खेळणारे खेळाडू आक्रमक खेळतील. मला आनंद आहे की सर्वकाही चांगले जुळून आले आणि आम्ही धावफलकावर चांगल्या धावा लावल्या.'

त्याचबरोबर विराटने अनुष्का शर्माबद्दलही प्रतिक्रिया दिली. अनुष्काही स्टेडियममध्ये उपस्थित होती.

विराट म्हणाला, 'अनुष्का तिथे बसलेली होती, सचिन पाजीही इथे होते. माझ्यासाठी याबद्दल व्यक्त होणेही कठीण आहे. जर मी एखादं परिपूर्ण चित्र रंगवू शकतो, तर मी हेच चित्र रंगवेल. माझी अर्धांगिनी, जिच्यावर मी खूप प्रेम करतो, ती तिथे बसली आहे, माझा आदर्श असलेला व्यक्ती तिथे बसलेला आहे आणि मी त्या सर्वांसमोर आणि वानखेडे स्टेडियममध्ये 50 वे वनडे शतक ठोकले, ते खूप शानदार होते.'

दरम्यान, विराटने 50 वनडे शतके केल्यानंतर सचिननेही त्याचे कौतुक केले.

भारताचा विजय

सामन्याबद्दल सांगायचे झाले, तर भारताकडून विराट व्यतिरिक्त श्रेयस अय्यरने 105 धावांची शतकी खेळी केली. तसेच शुभमन गिलने नाबाद 80 धावा केल्या, तर कर्णधार रोहित शर्माने 47 धावांची खेळी केली. त्यामुळे भारताला 50 षटकात 4 बाद 397 धावा करता आल्या. न्यूझीलंडकडून टीम साऊदीने 3 विकेट्स घेतल्या, तर ट्रेंट बोल्टने 1 विकेट घेतली.

त्यानंतर न्यूझीलंडचा 398 धावांच्या आव्हानाचा पाठलाग करताना 48.5 षटकात सर्वबाद 327 धावा करता आल्या. न्यूझीलंडकडून डॅरिल मिचेलने 134 धावांची शानदार खेळी केली. तसेच केन विलियम्सनने 69 धावांची खेळी केली, तर ग्लेन फिलिप्सने 41 धावांची खेळी केली. मात्र, त्यांना न्यूझीलंडला विजय मिळवून देता आला नाही.

भारताकडून मोहम्मद शमीने सर्वाधिक 7 विकेट्स घेतल्या. तसेच जसप्रीत बुमराह, मोहम्मद सिराज आणि कुलदीप यादव यांना प्रत्येकी 1 विकेट घेता आली.