पणजी ः गोव्याच्या तेजस शेवडे याला गास्पार डायस खुल्या टेनिस स्पर्धेत पाचव्यांदा विजेतेपद मिळविण्याची संधी आहे, पण त्यासाठी त्याला गतविजेता कर्नाटकचा प्रणीत वेणुगोपाळ याचे प्रबळ आव्हान मागे सारावे लागेल.

पुरुष एकेरीत गतवर्षीही प्रणीत आणि तेजस यांच्यात अंतिम लढत झाली होती, त्यावेळी स्नायू दुखावल्यामुळे तेजसला सामन्यातून माघार घ्यावी लागली होती व उपविजेतेपदावर समाधान मानावे लागले होते. यापूर्वी तेजसने चार वेळा ही स्पर्धा जिंकली आहे.

स्पर्धेच्या (Competition) उपांत्य फेरीत मडगावस्थित तेजसने एकही गेम न गमावता सूरज बिक्कान्नावर याचा 6-0, 6-0 असा फडशा पाडला. दुसऱ्या उपांत्य लढतीत बंगळूरच्या (Bangalore) प्रणीतने आपल्याच शहरातील अँड्र्यू याला 6-1, 6-3 असे सरळ सेट्समध्ये नमविले.

पुरुषांच्या दुहेरीत काफिल कडवेकर व अश्विन नरसिंघानी यांनी अंतिम फेरीत प्रवेश केला. त्यांनी अँड्र्यू व राजू जोडीवर 6-7, 6-3, 10-7 अशी मात केली. मिश्र दुहेरीत संतोष व मेलानी चौगुले यांनी अंतिम फेरी गाठताना आदर्श आणि बबिता अँथनी जोडीवर 7-6 (4), 6-2 असा विजय नोंदविला.

अखिलेश मुलांत विजेता

अखिलेश चव्हाण याने आदित्य जाधव याच्यावर 4-1, 4-3 (4) फरकाने विजय मिळवून 12 वर्षांखालील मुलांच्या एकेरीत विजेतेपदाचा (Winner) किताब जिंकला. उपांत्य लढतीत अखिलेशने अरहान इनामदार याच्यावर 4-3, 3-4, 10-8 असा, तर आदित्यने कियान याच्या 4-0, 4-0 असा विजय मिळविला होता.