पणजी : तेजस शेवडे आणि ऑलिव्हिया चौगुले यांनी मिश्र दुहेरीत, तर सूरज बिक्कान्नावर आणि प्रणीत वेणुगोपाळ यांनी पुरुष दुहेरीत विजेतेपद मिळवून गास्पार डायस खुल्या टेनिस स्पर्धेत छाप पाडली.

स्पर्धेच्या दुहेरीतील अंतिम लढती मिरामार येथील क्लब टेनिस द गास्पार डायस टेनिस (Tennis) कोर्टवर झाले. मिश्र दुहेरीत तेजस व ऑलिव्हिया जोडीने संतोष आणि मेलानी चौगुले जोडीवर एका गेमच्या मोबदल्यात 6-1, 6-0 अशी सरळ सेट्समध्ये मात केली. ऑलिव्हियाने यापूर्वीच 16 वर्षांखालील मुलींतही विजेतेपद मिळविले आहे. महिला एकेरीतील अंतिम लढतीतही खेळणार असल्याने तिला या स्पर्धेत तिहेरी किताबाची संधी आहे. तेजसने पुरुष एकेरीतही अंतिम फेरी गाठली आहे.

महिला एकेरीत ऑलिव्हिया हिच्यासमोर कोल्हापूरच्या (Kolhapur) रितिका डावलकर हिचे आव्हान असेल. उपांत्य लढतीत रितिकाने रिबेका जॉर्ज हिचा 6-0, 6-0 असा धुव्वा उडविला. रितिकाने 12 वर्षांखालील मुलींची अंतिम लढत यापूर्वीच जिंकली आहे. पुरुष एकेरीत तेजस व प्रणीत यांच्यात विजेतेपदासाठी चुरस आहे.

पुरुष दुहेरीतील अंतिम लढतीत प्रणीत वेणुगोपाळ व सूरज बिक्कान्नावर जोडीने काफिल कडवेकर आणि अश्विन नरसिंघानी जोडीवर चुरशीच्या लढतीत 4-6, 6-4, 10-7 असा विजय नोंदविला. त्यापूर्वी अश्विन याने 16 वर्षांखालील मुलांच्या एकेरीत विजेतेपद (Winner) मिळवले होते. त्याने साईल गजिनकर याच्यावर 6-2, 6-0 असा विजय प्राप्त केला.