गोव्याचा माजी रणजी करंडक क्रिकेट कर्णधार, 25 वर्षांखालील संघ प्रशिक्षक स्वप्नील अस्नोडकर यांच्याकडे भारतीय क्रिकेट नियामक मंडळाच्या (बीसीसीआय) राष्ट्रीय क्रिकेट अकादमीने (एनसीए) महत्त्वाची जबाबदारी सोपविली आहे.

कटक येथील 16 वर्षांखालील मुलांच्या विभागीय प्रशिक्षण शिबिरासाठी स्वप्नील यांनी फलंदाजी प्रशिक्षकपदी नियुक्ती झाली.

कटक येथील बाराबती स्टेडियमवर सोमवारपासून (ता. 17) शिबिरास सुरवात होईल आणि ते 11 मेपर्यंत चालेल. या शिबिरात स्वप्नील फलंदाजी प्रशिक्षक असतील. यासंबंधी एनसीएतर्फे स्वप्नील यांना कळविण्यात आले असून ते रविवारी शिबिरास्थळी दाखल झाले.

गतवर्षी एनसीएतर्फे क्रिकेट प्रशिक्षकांसाठी घेतलेल्या हायब्रिड लेव्हल-२ अभ्यासक्रमात स्वप्नील विशेष श्रेणीत उत्तीर्ण झाले होते. ते यंदा गोव्याच्या 25 वर्षांखालील क्रिकेट संघाचे मुख्य प्रशिक्षक होते. त्यापूर्वी तीन मोसम त्यांनी गोव्याच्या 23 वर्षांखालील, तसेच 19 वर्षांखालील संघासाठी मार्गदर्शकाची जबाबदारी पेलली होती.

एनसीए विभागीय शिबिरासाठी फलंदाजी प्रशिक्षकपदी नियुक्ती केल्याबद्दल स्वप्नील यांनी बीसीसीआय, एनसीए आणि गोवा क्रिकेट असोसिएशनचे (जीसीए) आभार मानले आहेत.

गोव्यातर्फे सर्वाधिक रणजी धावा

स्वप्नील सध्या 39 वर्षीय आहेत. गोव्यातर्फे त्यांनी 84 रणजी क्रिकेट सामन्यांत १४ शतकांसह त्यांनी सर्वाधिक 5731 धावा केल्या आहेत. एकंदरीत 4 दुलिप करंडक सामन्यांसह त्यांनी 88 प्रथम श्रेणी सामन्यांत 40.02 च्या सरासरीने 5883 धावा नोंदविल्या आहेत.