पणजी : गोवा क्रिकेट असोसिएशनच्या ब गट क्रिकेट स्पर्धेत तिसवाडी विभागीय विजेतेपद मिळविलेल्या स्टॅमिना क्रिकेट क्लबची आगेकूच कायम आहे. शुक्रवारी त्यांनी सम्राट स्पोर्टस क्लबला 50 धावांनी हरवून स्पर्धेची उत्तर विभागीय अंतिम फेरी गाठली.

पर्वरी येथील जीसीए अकादमी मैदानावर झालेल्या लढतीत अष्टपैलू रुपेश सर्वणकर स्टॅमिना क्लबच्या विजयाचा शिल्पकार ठरला. संघाच्या कर्णधाराने 39 धावा केल्या, तसेच तीन गडीही बाद केले. स्टॅमिना क्लबने प्रथम फलंदाजी करताना 8 बाद 222 धावा केल्या, नंतर सम्राट क्लबचा डाव 172 धावांत संपुष्टात आला.

उत्तर विभागीय अंतिम लढतीत स्टॅमिना क्लबसमोर डिचोली क्रिकेट क्लबचे आव्हान आहे. हा सामना शनिवारी (ता. 28) पर्वरी येथेच खेळला जाईल.

संक्षिप्त धावफलक

स्टॅमिना क्रिकेट क्लब : 40 षटकांत 8 बाद 222 (सचिन सरदेसाई 20, प्रमोद नाईक 16, ओमकार भंडारी 37, आदित्य दीक्षित 33, सागर वंटमुरी 31, रुपेश सर्वणकर 39, कृष्णा ठाकूर नाबाद 15, तेजस देसाई 1-38, साहिल आरोलकर 2-44, कुणाल थोरात 2-31, गौरव नाईक 1-45, जयेश गडेकर 1-5) वि. वि. सम्राट स्पोर्टस क्लब : 34.4 षटकांत सर्वबाद 172 (संतोष तुळसकर 31, विनोद नाईक 21, आशिष नाईक 39, तेजस देसाई 18, साहिल आरोलकर 20, हर्ष जेटाजी 3-36, संचित खन्ना 2-25, कृष्णा ठाकूर 1-21, रुपेश सर्वणकर 3-37, सागर वंटमुरी 1-12).