Harry Brook Century: इंडियन प्रीमियर लीग 2023 स्पर्धेत शुक्रवारी सनरायझर्स हैदराबाद संघाचा स्टार फलंदाज हॅरी ब्रुकने कोलकाता नाईट रायडर्स संघाविरुद्ध खेळताना शतकी खेळी केली. त्याच्या या शतकानंतर सोशल मीडियावर विविध प्रतिक्रिया उमटत आहेत.

24 वर्षीय ब्रुकने या सामन्यात 55 चेंडूत 100 धावांची नाबाद खेळी केली. या खेळीत त्याने 12 चौकार आणि 3 षटकार मारले. त्याचे हे आयपीएल कारकिर्दीतील पहिलेच शतक आहे. त्याने चालू हंगामातूनच आयपीएलमध्ये पदार्पण केले आहे. सनरायझर्स हैदराबादने त्याला आयपीएल 2023 लिलावादरम्यान 13.25 कोटी रुपयांना खरेदी केले आहे.

दरम्यान, ब्रुकची बॅट पहिल्या तीन सामन्यांमध्ये फारशी तळपली नव्हती. त्याने गेल्या तीन सामन्यांमध्ये 13, 3, 13 अशा खेळी केल्या होत्या. पण त्याने त्याच्या चौथ्या आयपीएल सामन्यात खेळताना शतक झळकावले आहे. तसेच ब्रुकचे हे शतक आयपीएल 2023 हंगामातीलही पहिलेच शतक ठरले आहे.

त्यामुळे सध्या सोशल मीडियावर अनेक मजेदार मीम्सही व्हायरल होत आहेत. तसेच अनेक आजी-माजी क्रिकेटपटूंनीही ब्रुक भविष्यातील सुपरस्टार ठरेल असे अंदाजही वर्तवले आहेत.

या सामन्यात सलामीवीर मयंक अगरवालची (9) विकेट लवकर विकेट गमावली होती. तसेच राहुल त्रिपाठीपण 9 धावांवर बाद झाला. पण नंतर ब्रुक आणि कर्णधार एडन मार्करमने हैदराबादचा डाव सांभाळताना 72 धावांची भागीदारी केली. मार्करमनेही 50 धावांची अर्धशतकी खेळी केली.

तसेच ब्रुकने अभिषेक शर्माबरोबर देखील 72 धावांची भागीदारी केली. अभिषेकने 32 धावांची खेळी केली. तसेच अखेरीस हेन्रिक क्लासेनने 6 चेंडूत नाबाद 16 धावांची खेळी केली. त्यामुळे हैदराबादने 20 षटकात 4 बाद 228 धावा उभारल्या. कोलकाताकडून आंद्र रसेलने 3 विकेट्स घेतल्या. तसेच वरुण चक्रवर्तीने 1 विकेट घेतली.