Crocodile Kills soccer player: क्रीडा विश्वातून एक धक्कादायक घटना समोर आली आहे. कोस्टा रिकामधील 29 वर्षीय फुटबॉलपटूला मगरीच्या हल्ल्यात जीव गमवावा लागला आहे. जीजस अल्बर्टो लोपेज ऑर्टिझ असे या फुटबॉलपटूचे नाव आहे.

मार्सा या स्पेनिश आऊटलेटने याबद्दल माहिती दिली आहे. दरम्यान, त्याचा मृत्यू बुडून झाला की मगरीच्या हल्ल्यात झाला, हे स्पष्ट होऊ शकले नाही. ही घटना कोस्टा रिकाची राजधानी सॅन जोसपासून सुमारे 140 किमी अंतरावर असलेल्या गुआनाकास्ट प्रांतामधील सांताक्रूझ शहराजवळ घडली.

ही घटना कॅनस नदीत घडली. व्यायाम करत असताना ऑर्टिझने मगरींच्या अस्तित्वामुळे बंद असलेल्या मासेमारी पुलावरून ऑर्टिझने नदीत उडी मारली होती. यादरम्यान, त्याचे शरीर मगरीने तोंडात धरलेले असतानाचा विचलीत करणारा व्हिडिओ देखील सोशल मीडियावर सध्या व्हायरल होत आहे.

दरम्यान, काही मीडिया रिपोर्ट्सनुसार मगर ऑर्टिझच्या शरीराचा ताबा सोडत नव्हती. तसेच त्याला घेऊन पाण्यात लपवण्यासाठी घेऊन जात होती. त्याचमुळे स्थानिक रेड क्रॉस दलाने मगरीला गोळी घातली. पोलिसांनी सांगितले की जर मगरीला गोळी घातली नसती, तर तिने ऑर्टिझचे शव खोल पाण्यात नेऊन लपवले असते आणि नंतर ते मिळाले नसते.

दरम्यान, ऑर्टिझ डेपोर्टिवो रिओ कॅनास संघाकडून खेळायचा. तो कोस्टा रिकन एसेन्सो लीगमध्येही खेळला होता. त्याच्या संघानेही फेसबुक पोस्टमधून त्याच्या निधनाची पुष्टी केली आहे.

त्यांनी पोस्टमध्ये लिहिले आहे की 'आम्ही आमचा खेळाडू जीजस लोपेझ ऑर्टिझ (छुचो) याच्या निधनाबद्दल दु:ख व्यक्त करतो. त्याच्या आत्म्यास शांती लाभो. आजचा दिवस सर्वांसाठीच खूप कठीण आहे. एक प्रशिक्षक, खेळाडू आणि एक कुटुंबशील व्यक्ती म्हणून तुझ्या क्रीडा प्रवासातील अनेक पैलूंमध्ये आम्ही तुझी आठवण ठेवू. तू नेहमी आमच्या हृदयात राहशील छुचो.'

ऑर्टिझच्या मागे त्याची 8 आणि 3 वर्षांची दोन मुले आहेत.