Asia Cup 2023 Super-4 Match: आशिया कपच्या सुपर-4मध्ये टीम इंडियाने सलग दोन सामने जिंकून फायनलमध्ये प्रवेश केला आहे.

टीम इंडियाने पहिल्या सामन्यात पाकिस्तानचा तर दुसऱ्या सामन्यात श्रीलंकेचा पराभव केला होता. पण दुसऱ्या सामन्यात टीम इंडियाची फलंदाजी काही खास नव्हती. भारताने हा सामना गमावला असता तर पाकिस्तानचा संघ स्पर्धेतून बाहेर पडू शकला असता.

आता या सामन्याबाबत पाकिस्तानचा माजी वेगवान गोलंदाज शोएब अख्तरचा व्हिडिओ सोशल मीडियावर व्हायरल होत असून, त्यामुळे क्रिकेट विश्वात खळबळ उडाली आहे.

शोएब अख्तरने धक्कादायक वक्तव्य केलं आहे

भारत (India) आणि श्रीलंका यांच्यातील हा सामना 12 सप्टेंबर रोजी खेळला गेला होता. शोएब अख्तरचा (Shoaib Akhtar) हा व्हायरल व्हिडिओ याच सामन्यातील आहे.

भारताचा डाव संपल्यानंतर सोशल मीडियावर मॅच फिक्सिंगबाबतचे मीम्स मोठ्या प्रमाणावर शेअर करण्यात आले.

पाकिस्तानचा माजी वेगवान गोलंदाज शोएब अख्तरने दावा केला आहे की, असे मीम्स त्यालाही पाठवण्यात आले होते. मात्र, हा पूर्णपणे चुकीचा आरोप असल्याचे अख्तरने व्हिडिओद्वारे सांगितले.

टीम इंडियाने मॅच फिक्सिंग केलं का?

शोएब अख्तरने (Shoaib Akhtar) मीम्स पाठवणाऱ्यांना फटकारले आणि त्याच्या यूट्यूब चॅनलवर म्हणाला, 'मला माहित नाही तुम्ही लोक काय करत आहात.

मला मीम्स आणि मेसेज येत आहेत की भारताने मॅच फिक्स केली आहे. पाकिस्तानला आशिया कपमधून बाहेर काढण्यासाठी टीम इंडिया जाणीवपूर्वक हरत आहे. तुम्ही ठीक आहात का? ते चांगली गोलंदाजी करत आहेत.

वेलालागे आणि असलंका यांनी शानदार गोलंदाजी केली. तुम्ही तो 20 वर्षांचा मुलगा पाहिला का? त्याने धावाही केल्या. मला भारत आणि इतर देशांतून फोन येत आहेत की ते मुद्दाम हरत आहेत.

अख्तर पुढे म्हणाला, 'तो का हरेल, मला सांगा? त्याला अंतिम फेरीत जायचे आहे. तुम्ही विनाकारण मीम्स बनवत आहात. भारताकडून चांगली लढत झाली. कुलदीपने शानदार गोलंदाजी केली. जसप्रीत बुमराहकडे पाहा, छोटी टोटल असताना त्यांनी केलेली फाइट पाहा...'