पणजी: आगामी सीनियर महिला एकदिवसीय क्रिकेट स्पर्धेत (Women's ODI cricket tournament) गोव्याची (Goa) मदार अनुभवी खेळाडूंवर असेल. स्पर्धेसाठी वीस सदस्यीय संघ निवडण्यात आला असून कसोटी अष्टपैलू शिखा पांडे (Shikha Pandey) हिच्याकडे कर्णधारपद कायम ठेवण्यात आले.

ऑस्ट्रेलियाचा दौरा आटोपून शिखा गोव्याच्या संघात दाखल झाली आहे. विशाखापट्टणमला जाणाऱ्या संघात सुनंदा येत्रेकर, रूपाली चव्हाण, विनवी गुरव, संजुला नाईक, तेजस्विनी दुर्गड, निकिता मळीक, पूर्वजा वेर्लेकर या अनुभवी खेळाडूंचा समावेश आहे. याशिवाय १९ वर्षांखालील स्पर्धेत प्रभावी कामगिरी केलेल्या इब्तिसाम शेख, सावली कोळंबकर, मिताली गौंडर, तनया नाईक खेळाडूंचीही निवड करण्यात आली आहे.

गोवा क्रिकेट असोसिएशनचे प्रशिक्षण-क्रिकेट कार्यवाही संचालक प्रकाश मयेकर, महिला क्रिकेट प्रतिनिधी संगीता मांजरेकर, निवड समिती अध्यक्ष डेझी डिसोझा, सदस्य कृत्तिका नाईक, लिझेट वाझ, संघाचे मुख्य प्रशिक्षक अनंत तांबवेकर यांची बैठक मंगळवारी झाली, त्यावेळी स्पर्धेसाठी संघ निवडण्यात आला.

मोहीम 31 पासून

गोव्याचे सामने आंध्र प्रदेशमधील विखाखापट्टणम आणि विझियानगरम येथे खेळले जातील. विलगीकरण प्रक्रिया 23 ऑक्टोबरपासून सुरू होईल, तर सामने 31 ऑक्टोबरपासून सुरू होतील. एलिट ‘ड’ गटात गोव्यासह विदर्भ, हरयाणा, मध्यप्रदेश, गुजरात व मिझोराम हे संघ आहेत.

गोव्याचा महिला संघ

शिखा पांडे (कर्णधार), विनवी गुरव, तेजस्विनी दुर्गड, संजुला नाईक, इब्तिसाम शेख, सुनंदा येत्रेकर, निकिता मळीक, रूपाली चव्हाण, सावली कोळंबकर, श्रेया परब, सोनाली गौंडर, पूर्वा भाईडकर, पूर्वजा वेर्लेकर, दीक्षा आमोणकर, दिव्या नाईक, सिया फळदेसाई, मंजुश्री भगत, सेजल सातार्डेकर, मिताली गौंडर, तनया नाईक.