पणजी: गोव्याची (Goa) प्रमुख महिला बॅडमिंटनपटू संध्या मेलाशीमी (Badminton player Sandhya Melashimi) हिला अखिल भारतीय मास्टर्स मानांकन बॅडमिंटन (Master Badminton) स्पर्धेत 35+ वयोगटातील महिला दुहेरीत विजेतेपद मिळाले, मात्र एकेरीत तिला उपविजेतेपदावर समाधान मानावे लागले.

अंतिम लढती नावेली येथील मनोहर पर्रीकर इनडोअर स्टेडियममध्ये रविवारी झाल्या. राष्ट्रीय मास्टर्स बॅडमिंटन स्पर्धेतील माजी तिहेरी विजेती असलेल्या संध्याने महिला दुहेरीत कर्नाटकच्या संगीता मारी हिच्या साथीत बाजी मारली. महिला एकेरीत संध्याला केरळच्या पारुल रावत हिच्याकडून हार पत्करावी लागली.

महिला दुहेरीत संध्या व संगीता जोडीने तासभराहून जास्त काळ चाललेल्या अंतिम लढतीत नुपूरा गाडगीळ व पूजा पाटील जोडीवर 21-19, 18-21, 21-13 फरकाने मात केली. महिला एकेरीतील अंतिम लढतीत संध्याला पारूल हिच्याकडून 21-16, 6-21, 11-21 फरकाने हार स्वीकारावी लागली.