Rishabh Pant: बांगलादेश विरुद्ध भारत यांच्यात चट्टोग्रामला सुरू असलेल्या कसोटी मालिकेतील पहिल्या सामन्यात भारतीय यष्टीरक्षक ऋषभ पंतने एका मोठ्या विक्रमाला गवसणी घातली आहे. हा सामना बुधवारी सुरू झाला आहे.

दरम्यान, या सामन्यात भारताने नाणेफेक जिंकून प्रथम फलंदाजी करण्याचा निर्णय घेतला. पण प्रथमदर्शनी भारताची या सामन्यात फारशी बरी सुरूवात झाली नाही. भारताने 50 धावांच्या आतच 3 विकेट्स गमावल्या होत्या.

पण, अशा परिस्थितीत पंत पाचव्या क्रमांकावर फलंदाजीला आला. त्याने आक्रमक पवित्रा स्विकारत फटकेबाजी केली. यावेळी त्याने 45 चेंडूत 46 धावांची खेळी करताना 6 चौकार आणि 2 षटकार मारले. त्याच्या या फटकेबाजीमुळे भारताला सहज 100 धावांचा टप्पा पार करता आला.

याच खेळीदरम्यान त्याने कसोटीत 50 षटकार मारण्याचा टप्पाही पूर्ण केला. दरम्यान, तो कसोटीत सर्वात जलद 50 षटकार पूर्ण करणारा खेळाडू आहे. त्याने त्याचा 50 वा षटकार मेहदी हसनच्या चेंडूवर मारला. बांगलादेशविरुद्ध खेळत असलेला सामना पंतचा कारकिर्दीतील 32 वा सामना असून त्याने आत्तापर्यंत 54 डावात फलंदाजी केली आहे.

तसेच पंत कसोटीत 50 षटकार मारणारा चौथाच यष्टीरक्षक आहे. यापूर्वी ऍडम गिलख्रिस्ट, एमएस धोनी आणि ब्रॅड हॅडिन या यष्टीरक्षकांनी 50 षटकार ठोकले आहेत. विशेष म्हणजे यातील केवळ गिलख्रिस्टलाच 100 षटकार मारता आले आहेत. धोनीने 78 आणि हॅडिनने 54 षटकार मारले आहेत.

याशिवाय पंतने त्याच्या आंतरराष्ट्रीय कारकिर्दीत 4000 धावाही पूर्ण केल्या आहेत.

भारताची समाधानकारक सुरुवात

भारताने पहिल्या दिवसाच्या दुसऱ्या सत्राखेरपर्यंत 56 षटकांत 4 बाद 174 धावा केल्या आहेत. भारताकडून कर्णधार केएल राहुल आणि शुभमन गिल यांनी सलामीला फलंदाजी केली. पण ते खेळपट्टीवर स्थिर झाल्यानंतर लगेचच बाद झाले. केएल राहुलने 22 धावा केल्या आणि शुभमनने 20 धावा केल्या.

तसेच विराट कोहलीही लगेचच बाद झाला. त्याला 1 धावेवर तैजुल इस्लामने बाद केले. तसेच नंतर पंतने चेतेश्वर पुजारासह डाव सांभाळण्याचा प्रयत्न केला होता. त्यांनी 64 धावांची भागीदारीही केली. मात्र, पंत 46 धावांवर बाद झाला.

त्यानंतर आता श्रेयस अय्यर फलंदाजीला आला असून त्यानेही चांगली फलंदाजी करताना पुजारासह दुसऱ्या सत्राखेरपर्यंत नाबाद अर्धशतकी भागीदारी केली आहे. दुसरे सत्र संपले, तेव्हा पुजारा 42 आणि श्रेयस 41 धावांवर खेळत आहे.