Ravindra Jadeja Relation with CSK: इंडियन प्रीमियर लीग म्हणजेच आयपीएलमधील चेन्नई सुपर किंग्स (CSK) लोकप्रिय संघांपैकी एक आहे. सीएसकेने आत्तापर्यंत मोठे यश एमएस धोनीच्या नेतृत्वाखाली मिळवले आहे. सीएसकेने आत्तापर्यंत खेळलेल्या सर्व हंगामात धोनीने सीएसकेचे नेतृत्व करताना चारवेळा आयपीएलचे विजेतेपदही मिळवून दिले.

पण गेल्यावर्षी म्हणजे आयपीएल 2022 च्या हंगामापूर्वी धोनीने सीएसकेचे कर्णधारपद अष्टपैलू क्रिकेटपटू रविंद्र जडेजाकडे सोपवले. मात्र, सुरुवातीपासूनच त्याच्या नेतृत्वाखाली सीएसकेची कामगिरी खालावली आणि जडेजाचे वैयक्तिक कामगिरीही खालावली. त्यानंतर त्याने पहिल्या 8 सामन्यांनंतर त्याने या नेतृत्वपदाचा त्याग करत पुन्हा धोनीकडे कर्णधारपद सोपवले.

या सर्व घटनांदरम्यान जडेजा आणि सीएसके फ्रँचायझीमध्ये दरी निर्माण झाली होती. तसेच अनेक रिपोर्ट्सनुसार जडेजाने हॉटेल रूमही सोडली होती. तो त्या हंगामातील अखेरचे काही सामने दुखापतीमुळे खेळला नव्हता.

त्यावेळी अनेक रिपोर्टमध्ये असेही सांगण्यात आलेले की त्याला त्यावेळी निर्माण झालेल्या वादामुळे खेळायचे नव्हते. इतकेच नाही, तर अशीही चर्चा रंगली होती की आयपीएल 2023 पूर्वी जडेजाला सीएसके संघ मुक्त करेल. पण तसे काहीही झाले नाही. अखेर सीएसकेचा अनुभवी खेळाडू आणि कर्णधार धोनीने मध्यस्थी केली.

क्रिकबझच्या रिपोर्टनुसार आयपीएल 2023 पूर्वी धोनीने जडेजाबरोबर समोरा-समोर दीर्घकाळ चर्चा केली. त्यामुळे जडेजा आणि सीएसके यांच्यातील संबंध सुधारण्यात मदत झाली. जडेजाने सीएसकेचे सीईओ कासी विश्वनाथन यांच्याबरोबर देखील संवाद साधला. त्यामुळे गैरसमज दूर झाले.

तसेच रिपोर्टनुसार जडेजा सीएसकेवर दोन कारणांमुळे नाराज होता. एक म्हणजे त्याच्याकडून कर्णधारपद काढून घेणे आणि दुसरे म्हणजे नेतृत्वाच्या दबावाचा परिणाम त्याच्या वैयक्तिक कामगिरीवर पडत होता. तथापि, नंतर जडेजालाही सर्व समजावून सांगण्यात आले आणि त्यानेही संघाबरोबर पुढे जाण्याची तयारी दाखवली.

जडेजाने गेल्यावर्षी आयपीएलमध्ये 10 सामने खेळले होते, ज्यात त्याने 119 धावा केल्या होत्या आणि 5 विकेट्स घेतल्या होत्या. त्या हंगामात सीएसके 10 संघांमध्ये 9व्या क्रमांकावर राहिले होते.

दरम्यान, जडेजा काही दिवसांपूर्वीच आयपीएल 2023 स्पर्धेसाठी सीएसकेशी जोडला गेला असून त्याने तयारीलाही सुरुवात केली आहे. आयपीएल 2023 मध्ये सीएसकेला पहिला सामना 31 मार्च रोजी गुजरात टायटन्स विरुद्ध खेळायचा आहे. हा या हंगामातील सलामीचा सामना असणार आहे.