Rahkeem Cornwall 1st T20 Century with 12 Sixes in CPL:

वेस्ट इंडिजमध्ये सध्या कॅरेबियन प्रीमियर लीग स्पर्धा सुरू आहे. या स्पर्धेत रविवारी सेंट किट्स अँड नेविस पॅट्रिओट्स विरुद्ध बार्बाडोस रॉयल्स संघात सामना झाला. या सामन्यात बार्बाडोस रॉयल्सकडून राहकिम कॉर्नवॉलने शानदार शकर ठोकले.

राजस्थान रॉयल्सचीच फ्रँचायझी असलेल्या बार्बाडोस रॉयल्ससमोर सेंट किट्सने २२१ धावांचे आव्हान ठेवले होते. या आव्हानाचा पाठलाग करताना जवळपास १४० किलो वजन असलेल्या राहकिम कॉर्नवॉलने १०२ धावांची खेळी केली.

कॉर्नवॉलने ४५ चेंडूत त्याचे तुफानी शतक पूर्ण केले होते. पण नंतर तो रियायर्ड हर्ट झाला. कॉर्नवॉलचे हे टी२० कारकिर्दीतील पहिलेच शतक ठरले.

कॉर्नवॉलने ४८ चेंडूत १०२ धावांची खेळी केली. या खेळीत त्याने ४ चौकार आणि तब्बल १२ षटकार मारले. म्हणजेच तब्बल ८८ धावा त्याने बाउंड्रीच्या रुपात वसूल केल्या.

तो तुफानी फटकेबाजी करत असताना त्याला दुसऱ्या बाजूने लॉरी इव्हान आणि कर्णधार रोवमन पॉवेलने दिली. या दोघांबरोबरही त्याच्या अर्धशतकी भागीदारी झाली.

त्यामुळे बार्बाडोसने २२१ धावांचे आव्हान १८.१ षटकातच केवळ २ विकेट्स गमावत पूर्ण केले. लॉरी इव्हानने १४ चेंडूत २४ धावांची खेळी केली. तसेच पॉवेलने २६ चेंडूत ४९ धावांची खेळी केली.

तत्पूर्वी या सामन्यात प्रथम फलंदाजी करणाऱ्या सेंट किट्सचीही फलंदाजी चांगली झाली. सेंट किट्सकडून यष्टीरक्षक फलंदाज आंद्रे फ्लेचर, विल स्मिद आणि कर्णधार शेरफेन रुदरफोर्ड यांनी अर्धशतके केली.

फ्लेचरने ३७ चेंडूत ५६ धावा केल्या, तर स्मिदने ३६ चेंडूत ६३ धावा केल्या. तसेच रुदरफोर्डने २७ चेंडूत नाबाद ६५ धावा केल्या. त्यामुळे सेंट किट्सने २० षटकात ४ बाद २२० धावा उभारल्या.

दरम्यान, गोलंदाजीतही कॉर्नवॉलची कामगिरी चमकदार राहिली. त्याने ३ षटकात २७ धावात २ विकेट्स घेतल्या. तसेच कार्लोस ब्रेथवेटने १ विकेट घेतली.