Syed Mushtaq Ali Trophy: सय्यद मुश्ताक अली ट्रॉफी 2023 चा अंतिम सामना पंजाब आणि बडोदा संघांमध्ये खेळला गेला. मोहालीच्या आयएस बिंद्रा स्टेडियमवर झालेल्या या सामन्यात विजय मिळवत पंजाबने इतिहास रचला.
पंजाबने (Punjab) मुश्ताक अली ट्रॉफीच्या अंतिम सामन्यात सर्वोच्च धावसंख्या नोंदवून प्रथमच ही स्पर्धा जिंकली. याआधी पंजाबने 4 वेळा अंतिम फेरी गाठली होती, मात्र त्यांना विजेतेपद मिळवता आले नव्हते.
दरम्यान, या सामन्यात बडोद्याचा कर्णधार क्रुणाल पांड्याने नाणेफेक जिंकून प्रथम गोलंदाजी करण्याचा निर्णय घेतला होता. प्रथम फलंदाजी करताना पंजाबने 20 षटकांत 4 गडी गमावून 223 धावा केल्या होत्या.
या सामन्यात अनमोलप्रीत सिंगने सर्वात मोठी खेळी खेळली. अनमोलप्रीतने 61 चेंडूत 10 चौकार आणि 6 षटकारांच्या मदतीने 113 धावा केल्या. त्याचवेळी, निहल वधेराने तुफानी खेळी केली. त्याने 27 चेंडूत 4 षटकार आणि 6 चौकारांच्या मदतीने नाबाद 61 धावा केल्या.
दुसरीकडे, 224 धावांच्या लक्ष्याचा पाठलाग करताना बडोदा संघ 20 षटकात केवळ 203 धावा करु शकला आणि 20 धावांनी सामना गमावला. बडोद्यातर्फे अभिमन्यू सिंग राजपूतने सर्वाधिक 61 धावा केल्या. तर निनाद राठवाने 47 आणि कर्णधार क्रुणाल पांड्याने 45 धावा केल्या.
अनमोलप्रीत सिंग फलंदाजीला आला तेव्हा पंजाबच्या संघाने 18 धावांवर दोन विकेट गमावल्या होत्या. यानंतर त्याने संघाची धुरा सांभाळली आणि स्पर्धेच्या इतिहासातील अंतिम सामन्यात सर्वोच्च वैयक्तिक धावसंख्याही केली.
त्याचबरोबर, स्पर्धेच्या अंतिम फेरीतील ही सर्वात मोठी धावसंख्या आहे. याआधी 2019-20 हंगामात कर्नाटकने (Karnataka) तामिळनाडूविरुद्ध 5 गडी गमावून 180 धावा केल्या होत्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.