Syed Mushtaq Ali T20, Prithvi Shaw: भारतीय संघात स्थान मिळवण्यासाठी अथक परिश्रम करणाऱ्या मुंबईच्या पृथ्वी शॉने टी-20 मध्ये शानदार प्रदर्शन केले आहे. सय्यद मुश्ताक अली ट्रॉफी टी-20 स्पर्धेत त्याने 46 चेंडूत शतक झळकावले. टी-20 फॉरमॅटमधील त्याचे हे पहिले शतक आहे. 22 वर्षीय पृथ्वीने शुक्रवारी आसामविरुद्धच्या सामन्यात 134 धावांची शानदार खेळी खेळली.

220 च्या स्ट्राईक रेटने फलंदाजी करत 46 चेंडूत शतक

आसामचा (Assam) कर्णधार मृणमय दत्ताने नाणेफेक जिंकून मुंबईला प्रथम फलंदाजीसाठी आमंत्रित केले होते. पण पृथ्वी एक मिशन घेऊन मैदानात उतरला. कर्णधार पृथ्वी शॉ (Prithvi Shaw) आणि अमन खानने सलामीची जबाबदारी घेतली. पृथ्वीने 46 चेंडूत टी-20 मधील पहिले शतक पूर्ण केले.

आसामच्या गोलंदाजांचा धुव्वा उडवला

राजकोटच्या एससीए स्टेडियमवर झालेल्या या गट-अ सामन्यात पृथ्वी शॉने सलामीची जबाबदारी स्वीकारली आणि संघाची धावसंख्या 230 पर्यंत नेण्यात महत्त्वाची भूमिका बजावली. पृथ्वीने आसामच्या गोलंदाजांची चांगलीच कोंडी केली. सुमारे 220 च्या स्ट्राईक रेटने खेळताना त्याने 134 धावा केल्या. पृथ्वीच्या खेळीत 13 चौकार आणि 9 षटकारांचा समावेश होता. यशस्वी जैस्वालच्या साथीने त्याने दुसऱ्या विकेटसाठी 114 धावांची भागीदारी केली. पृर्थ्वी जेव्हा पॅव्हेलियनमध्ये परतला तेव्हा मुंबईची (Mumbai) धावसंख्या 206 धावांपर्यंत पोहोचली होती.

मुंबईने आसामसमोर 231 धावांचे भक्कम लक्ष्य ठेवले होते

मुंबई संघाने निर्धारित 20 षटकात तीन गड्यांच्या मोबदल्यात 203 धावा करत आसामला 231 धावांचे लक्ष्य दिले. यशस्वीने 30 चेंडूंत पाच चौकार आणि एका षटकाराच्या मदतीने 42 धावा केल्या. शिवम दुबेने 7 चेंडूत 17 तर सर्फराज खान 15 चेंडूत 15 धावा करुन नाबाद परतले. रियान पराग, रोशन आलम आणि रज्जाकुद्दीन यांना प्रत्येकी एक विकेट मिळाली.

चार वर्षांपूर्वी आंतरराष्ट्रीय पदार्पण केले

पृथ्वी शॉने चार वर्षांपूर्वी कसोटीतून आंतरराष्ट्रीय पदार्पण केले होते. ऑक्टोबर 2018 मध्ये त्याने राजकोटमध्ये वेस्ट इंडिजविरुद्ध पहिली कसोटी खेळली. आतापर्यंत त्याने एकूण पाच कसोटी सामने खेळले आहेत. 2020 मध्ये त्याने एकदिवसीय आणि 2021 मध्ये T20 आंतरराष्ट्रीय पदार्पण केले. तो आतापर्यंत एकदिवसीय सामन्यांमध्ये सहा आणि टी-20 आंतरराष्ट्रीय फॉरमॅटमध्ये फक्त एकच सामना खेळू शकला आहे.