Pakistan fast bowler Naseem Shah injured his left arm:

आशिया चषक 2023 स्पर्धेत बुधवारपासून सुपर-4 फेरीचे सामने सुरु झाले आहेत. या फेरीतील पहिला सामना बुधवारी पाकिस्तान विरुद्ध बांगलादेश संघात पार पडला. लाहोरला पार पडलेल्या या सामन्यात पाकिस्तान क्रिकेटला मोठा धक्का बसला.

पाकिस्तानचा युवा वेगवान गोलंदाज या सामन्यादरम्यान दुखापतग्रस्त झाला होता. त्याच्या डाव्या हाताला दुखापत झाली होती. पण सुदैवाने तो उजव्या हाताने गोलंदाजी करत असल्याने गोलंदाजीदरम्यान समस्या उद्भवली नाही.

ही घटना सामन्याच्या 7 व्या षटकात घडली. त्यावेळी प्रथम फलंदाजी करणाऱ्या बांगलादेशकडून मोहम्मद नईम फलंदाजी करत होता, तर शाहिन आफ्रिदी गोलंदाजी करत होता.

या षटकातील दुसऱ्य चेंडूवर नईमने फाईन लेगला फटका मारला, जो आडवण्यासाठी नसीमने सूर मारला. त्यावेळी त्याच्या डाव्या हाताला दुखापत झाली. तो काहीवेळ त्याच्या हाताला धरून तसाच बसला.

त्यावेळी मोहम्मद रिझवानने लगेचच संघाच्या फिजिओथेरपिस्ट मैदानात बोलावले. त्यानंतर नसीम मैदानातून बाहेर गेला. दरम्यान, त्यानंतर तो पुन्हा मैदानात आला आणि त्याने गोलंदाजी केली.

मात्र, त्याची डाव्या हाताला झालेली दुखापत किती गंभीर आहे, याबाबत अद्याप माहिती मिळालेली नाही. पण जर दुखापत गंभीर असेल, तर पाकिस्तानसाठी मोठा धक्का ठरू शकतो. विशेषत: आगामी काही महत्त्वाच्या सामन्यांचा आणि वनडे वर्ल्डकपचा विचार करता पाकिस्तानला आशा असेल की नसीमची दुखापत गंभीर नसावी.

पाकिस्तानला सुपर-4 मध्ये भारताविरुद्ध 10 सप्टेंबर रोजी सामना खेळायचा आहे. हा सामना कोलंबोला होणार आहे.

दरम्यान, नसीमने बांगलादेशविरुद्ध 5.4 षटके गोलंदाजी करताना 34 धावा देत 3 विकेट्स घेतल्या. दरम्यान बांगलादेशचा डाव 38.4 षटकातच संपुष्टात आला. त्यांच्याकडून कर्णधार शाकिब अल हसनने सर्वाधिक 53 धावांची खेळी केली. तसेच मुशफिकूर रहिमने 64 धावांची खेळी केली. याशिवाय मोहम्मन नईमने 20 धावा केल्या.

या व्यतिरिक्त कोणालाही 20 धावांचा टप्पा पार करता आला नाही. पाकिस्तानकडून नसीम व्यतिरिक्त हॅरिस रौफने 4 विकेट्स घेतल्या, त्याचबरोबर शाहिन आफ्रिदी, फहिम अश्रफ आणि इफ्तिखार अहमद यांनी प्रत्येकी 1 विकेट घेतली.