NZ vs AUS: ऑस्ट्रेलिया आणि न्यूझीलंड यांच्यात खेळल्या जात असलेल्या दोन सामन्यांच्या कसोटी मालिकेतील दुसऱ्या सामन्यात ऑस्ट्रेलियाच्या घातक गोलंदाजीसमोर न्यूझीलंडचा संघ 162 धावांत सर्वबाद झाला, तर दुसरीकडे कांगारु संघाची अवस्थाही बिकट झाली. ऑस्ट्रेलियन संघही पहिल्या डावात 256 धावा करु शकला आणि पहिल्या डावात 94 धावांची आघाडी मिळवली. ऑस्ट्रेलियाला या धावसंख्येवर बाद करण्यात किवी संघाचा वेगवान गोलंदाज मॅट हेन्रीची भूमिका सर्वात महत्त्वाची ठरली, ज्याने घातक गोलंदाजीने कांगारु फलंदाजांचा चांगलाच समाचार घेतला.

दरम्यान, ऑस्ट्रेलियाविरुद्धच्या दुसऱ्या कसोटी सामन्याच्या पहिल्या डावात हेन्रीने 23 षटकात 67 धावा देऊन 7 बळी घेतले आणि यादरम्यान त्याने 4 मेडन षटके टाकली. हेन्रीने ऑस्ट्रेलियाचा सलामीवीर उस्मान ख्वाजा याला पहिल्या डावात आपला पहिला बळी बनवले आणि 16 धावांवर क्लीन बोल्ड केले. या विकेटनंतर त्याने झटपट विकेट घेतल्या आणि त्यानंतर कॅमेरुन ग्रीनला 25 धावांवर बाद केले. हेन्रीचा तिसरा बळी ठरला तो ट्रॅव्हिस हेड ज्याने 21 धावांची खेळी खेळली आणि तो झेलबाद झाला.

दुसरीकडे, या सामन्यात पुन्हा मॅट हेन्रीने नॅथन लायनला 20 धावांवर बाद करत ट्रॅव्हिस हेडला शून्यावर बाद करुन पॅव्हेलियनचा रस्ता दाखवला. यानंतर हेन्रीने मिचेल स्टार्कला 28 धावांवर बाद केले तर कर्णधार पॅट कमिन्स 23 धावांवर बाद झाला. हेन्रीचा ऑस्ट्रेलियाविरुद्ध कसोटी क्रिकेटमधील हा सर्वोत्तम स्पेल होता, तर या संघाविरुद्ध दुसऱ्यांदा पाच विकेट घेण्याचा चमत्कार त्याने केला. कांगारु संघाविरुद्ध पहिल्या डावात किवी संघाकडून हेन्रीशिवाय टीम साऊदी, बेन सियर्स आणि ग्लेन फिलिप्स यांनी प्रत्येकी एक बळी घेतला.