T 20 World Cup 2022: टी-20 वर्ल्डकपच्या सुपर 12 फेरीतील पहिल्याच सामन्यात न्यूझीलंडने यजमान ऑस्ट्रेलियाला 89 धावांनी पराभूत केले. डेवॉन कॉनवॉयच्या नाबाद 92 धावांच्या जोरावर न्यूझीलंडने 20 षटकात 3 बाद 200 धावा केल्या होत्या. प्रत्युत्तरात खेळताना ऑस्ट्रेलियाचा संपूर्ण डाव 111 धावात गुंडळाला गेला. मिचेल सँटनर आणि टीम साऊदीने प्रत्येकी 3 विकेट घेतल्या.

गेल्या काही दिवसात पात्रता फेरी पार पडल्यानंतर आता विश्वचषकातील मुख्य लढतींना सुरवात झाली आहे. सुपर-12 गटातील पहिला सामना गतविजेत्या ऑस्ट्रेलिया आणि न्यूझीलंड या प्रतिस्पर्ध्यांमध्ये झाला.

न्युझीलंडचे मोठे आव्हान घेऊन मैदानात उतरलेल्या ऑस्ट्रेलियाचे 4 फलंदाज 50 धावातच गारद झाले. त्यानंतर न्यूझीलंडच्या गोलंदाजांनी ऑस्ट्रेलियाची मधली फळीही कापुन काढत त्यांची अवस्था 7 बाद 89 अशी केली. भरवशाचा मॅक्सवेल देखील 20 चेंडूत 28 धावा करून बाद झाला. सँटनरने कर्णधार फिंचला 13 तर टीम साऊदीने शॉन मार्शला 16 धावांवर बाद करत कांगारूंची टॉप ऑर्डर पॅव्हेलियनमध्ये धाडली.

तत्पूर्वी, ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला. न्युझीलंडचा सलामीवीर डेवॉन कॉनवॉयच्या नाबाद 92 धावांच्या खेळीच्या जोरावर न्यूझीलंडने 20 षटकात 3 बाद 200 धावा केल्या. कॉनवॉयने 58 चेंडूत नाबाद 92 धावा केल्या. त्याला साथ देणाऱ्या जेमी नीशमने 13 चेंडूत 26 धावा केल्या. निशमने 200 च्या स्ट्राईक रेटने धावा केल्या.

त्याने हेजलवूडला शेवटच्या चेंडूवर षटाकर मारत न्यूझीलंडला 200 धावांपर्यंत पोहचवले. तर सलामीवीर फिन एलनने 16 चेंडूत 42 धावा चोपल्या. त्यानेही कांगारूंची 262.50 च्या स्ट्राईक रेटने धुलाई केली. ऑस्ट्रेलियाकडून हेजलवूडने 2 तर झाम्पाने 1 विकेट घेतली.

भारत विरूद्ध पाकिस्तान सामना उद्या

दरम्यान, टी-20 विश्वचषकातील महत्वाचा महामुकाबला उद्या, रविवारी भारत-पाकिस्तान या दोन पारंपरिक प्रतिस्पर्ध्यांमध्ये होणार आहे. दुपारी दीड वाजता मेलबोर्न क्रिकेट स्टेडियमवर होणार आहे.