रविवारी झालेल्या सामन्यात चेन्नई सुपर किंग्जला (CSK) दारूण पराभवाला सामोरे जावे लागले. या सामन्यात गुजरात टायटन्सने चेन्नईचा सात गडी राखून पराभव केला. सामन्यानंतर कर्णधार महेंद्रसिंग धोनीने मान्य केले की प्रथम फलंदाजी करणे हा अजिबात योग्य निर्णय नव्हता. (MS Dhoni accepted his mistake in IPL match against Gujarat Titans)

या निर्णयामुळे फलंदाजांची चांगलीच अडचण झाली. दुसऱ्या डावात चेंडू सहज बॅटवर येत असल्याने गुजरातला त्याचा फायदा झाला. या सामन्यात चेन्नई सुपर किंग्जने नाणेफेक जिंकून प्रथम फलंदाजी करण्याचा निर्णय घेतला. नाणेफेकीच्या वेळी महेंद्रसिंग धोनी म्हणाला होता की, आपण हे सूर्यप्रकाशामुळे केले आहे, तसेच हवामानानुसार खेळपट्टीचे वर्तन बदलेल. पण एमएस धोनीचा हा निर्णय चुकीचा ठरला, त्यानंतर त्यानेही तो मान्य केला.

सीएसकेचा कर्णधार म्हणाला की, आमच्या खेळाडूंनी चांगली गोलंदाजी केली. आम्ही शिवम दुबेला थोडे वर पाठवू शकलो असतो. एमएस धोनीने प्रथमच आयपीएलमध्ये खेळत असलेल्या श्रीलंकेचा गोलंदाज मथिशा पाथिरानाचेही कौतुक केले. धोनी म्हणाला की तो चांगला गोलंदाज आहे, काही प्रमाणात तो लसिथ मलिंगासारखा आहे.