भारतीय महिला क्रिकेट संघाने (Indian Women's Cricket Team) न्यूझीलंडविरुद्धच्या पाचव्या एकदिवसीय सामन्यात शानदार विजयाची नोंद केली आहे. पहिले चार सामने गमावल्यानंतर टीम इंडियाने (Team India) शेवटच्या सामन्यात 6 विकेट्सने दणदणीत विजय मिळवला. विजयासाठी 252 धावांच्या लक्ष्याचा पाठलाग करताना भारतीय संघाने 46 षटकांत न्यूझीलंडचा पराभव केला. भारताच्या विजयात स्मृती मंधानाने (Smriti Mandhana) 71 आणि हरमनप्रीत कौरने 63 धावा केल्या. कर्णधार मिताली राजनेही नाबाद 57 धावा करत संघाला विजय मिळवून दिला. मिताली राजच्या (Mithali Raj) या अफलातून खेळीने धोनीचा रेकॉर्ड ब्रेक केला आहे. (Mithali Raj Has Broken MS Dhoni's Record)

दरम्यान, मिताली राज पाठलाग करताना विजय मिळवणारी सर्वोत्तम भारतीय खेळाडू ठरली आहे. वनडे क्रिकेटमध्ये विजयाचा पाठलाग करताना मितालीची सरासरी 109.05 आहे. तिने या कालावधीत 2181 धावा केल्या आहेत.

तसेच, धोनीने धावांचा पाठलाग करताना 102.71 च्या सरासरीने 2876 धावा केल्या. मात्र, आता मिताली राजने त्याला मागे टाकले आहे. विराट कोहलीने विजयाचा पाठलाग करताना 94.66 च्या सरासरीने 5396 धावा केल्या आहेत. स्मृती मानधना देखील पाठलाग करण्यात माहिर आहे. लक्ष्याचा पाठलाग करताना तिने 69.94 च्या सरासरीने 1189 धावा केल्या आहेत. सुरेश रैनाने 66.60 च्या सरासरीने 1865 धावा केल्या आहेत. स्मृती मंधानाने न्यूझीलंडविरुद्धच्या पाचव्या एकदिवसीय सामन्यात सामनावीराचा पुरस्कार पटकावला होता. 84 चेंडूत 71 धावांची उत्कृष्ट खेळी स्मृतीने केली होती.