Sports: कोविड महामारीचा इंडियन सुपर लीग (ISL) फुटबॉल स्पर्धेच्या आठव्या मोसमात आणखी एका संघाला फटका बसला. सामन्यासाठी केरळा ब्लास्टर्स (Kerala Blasters) संघापाशी अपुरे खेळाडू असल्याचे कारण देत रविवारी नियोजित असलेला त्यांचा मुंबई सिटीविरुद्धचा सामना लांबणीवर टाकण्यात आला.

केरळा ब्लास्टर्स व मुंबई सिटी यांच्यातील सामना वास्को (Vasco) येथील टिळक मैदानावर खेळला जाणार होता. हा सामना आता नव्या तारखेला खेळविण्यात येईल, असे आयएसएलने नमूद केले. कोविड महामारीच्या (Corona) तिसऱ्या लाटेत गोव्यात सुरू असलेल्या स्पर्धेत पुढे ढकलण्यात आलेला हा तिसरा सामना आहे. 8 जानेवारी रोजी एटीके मोहन बागान व ओडिशा एफसी यांच्यातील, तर 15 जानेवारी रोजी एटीके मोहन बागान व बंगळूर एफसी यांच्यातील सामना झाला नव्हता.

केरळा ब्लास्टर्स संघापाशी या सामन्यासाठी आवश्यक खेळाडू नसल्याचे स्पष्ट झाल्यानंतर लीग वैद्यकीय समितीशी सल्लामसलत करून सामना लांबणीवर टाकण्याचा निर्णय घेण्यात आल्याचे आयएसएलने रविवारी जाहीर केले. स्पर्धेत सध्या केरळा ब्लास्टर्सचे 11 सामन्यांतून 20 गुण असून ते पहिल्या स्थानी आहेत. गतविजेत्या मुंबई सिटी संघाने 11 लढतीत 17 गुण नोंदविले असून ते चौथ्या क्रमांकावर आहेत.