ODI World Cup 2023: विश्वचषक 2023 चा आठवा सामना पाकिस्तानविरुद्ध श्रीलंका यांच्यात खेळला जात आहे. या सामन्यात श्रीलंकेने प्रथम फलंदाजी करत धावांचा डोंगर उभारला.

श्रीलंकेचा स्टार फलंदाज कुसल मेंडिसने शानदार शतकी खेळी करत अनेक विक्रम आपल्या नावावर केले आहेत. मेंडिसने पाकिस्तानी गोलंदाजांचा चांगलाच समाचार घेतला. त्याने अवघ्या 77 चेंडूत 122 धावा केल्या. यादरम्यान त्याने अवघ्या 65 चेंडूत शतक झळकावले.

दरम्यान, या सामन्यात श्रीलंकेने (Sri Lanka) नाणेफेक जिंकून प्रथम फलंदाजी करण्याचा निर्णय घेतला. लंकेने लवकरच पहिली विकेट गमावली, त्यानंतर लंकन संघ पाकिस्तानी गोलंदाजांसमोर गडगडेल असं वाटलं होतं.

पण कुसल मेंडिस फलंदाजीला आला, त्याने तूफान फटकेबाजी करत धावांचा डोंगर उभारला. अवघ्या 65 चेंडूत शतक झळकावणारा मेंडिस विश्वचषकात लंकेसाठी सर्वात जलद शतक झळकावणारा फलंदाज ठरला.

त्याने 122 धावांच्या खेळीत 14 चौकार आणि 6 षटकारही मारले. त्याची खेळी पाहून लंकेचे चाहते आनंदाने नाचू लागले. मेंडिस आज मोठी खेळी खेळणार असे वाटत होते, मात्र तो हसन अलीचा बळी ठरला.

कुमार संगकाराचा विक्रम मोडला

कुमार संगकाराने वेलिंग्टनमध्ये इंग्लंडविरुद्ध (England) 70 चेंडूत शतक झळकावले होते. त्याने 86 चेंडूत 117 धावांची नाबाद खेळी खेळली होती. यादरम्यान त्याने 11 चौकार आणि 2 षटकार मारले होते.

विश्वचषकात सर्वात जलद शतक झळकावण्याच्या बाबतीत कुसल मेंडिसने ऑस्ट्रेलियाचा दिग्गज मॅथ्यू हेडन (66 चेंडू) आणि कॅनडाचा जॉन डेव्हिसन (67 चेंडू) यांचाही विक्रम मोडला.

विश्वचषकात पाकिस्तानविरुद्ध श्रीलंकेच्या फलंदाजाने केलेली सर्वोच्च धावसंख्या

या खेळीदरम्यान कुसल मेंडिस पाकिस्तानविरुद्ध श्रीलंकेकडून सर्वाधिक धावा करणारा फलंदाज ठरला. यापूर्वी हा विक्रम रोशन महानामाच्या नावावर होता. 1987 मध्ये पाकिस्तानच्या हैदराबादमध्ये 89 धावा काढल्या होत्या.

ब्रेंडन कुरुप्पूने 1983 मध्ये स्वानसी येथे 72 धावा केल्या होत्या. श्रीलंकेचा संघ विश्वचषकात पाकिस्तानला पराभूत करु शकलेला नाही. दोन्ही संघांमध्ये 8 सामने झाले आहेत. पाकिस्तानने 7 सामने जिंकले आहेत. एक सामना पावसामुळे होऊ शकला नाही.