भारतीय क्रिकेटपटू केएल राहुल आणि बॉलिवूड अभिनेत्री अथिया शेट्टी लवकरच लग्न करण्याची शक्यता आहे. हे दोघेही जवळपास गेल्या चार वर्षांपासून एकमेकांना डेट करत आहेत. आता दोघेही जानेवारी 2023 मध्ये लग्नबंधनात अडकणार असल्याचे रिपोर्ट्स समोर आले आहेत.

केएल राहुल (KL Rahul) लग्नासाठी श्रीलंकेविरुद्ध होणाऱ्या मालिका खेळणार नसल्याचेही म्हटले जात आहे. रिपोर्ट्सनुसार त्यावेळी त्याने सुट्टी मागितली आहे. सध्या केएल राहुलला न्यूझीलंड दौऱ्यातून विश्रांती देण्यात आली होती. पण तो डिसेंबरमध्ये होणाऱ्या बांगलादेश दौऱ्यातून पुनरागमन करणार आहे.

पण नंतर श्रीलंकेविरुद्ध होणाऱ्या वनडे आणि टी20 मालिकेदरम्यान सुटी घेणार असल्याची शक्यता आहे. तरी अद्याप बीसीसीआयने श्रीलंकेविरुद्ध होणाऱ्या मालिकेबद्दल घोषणा केलेली नाही.

दरम्यान, पुढीलवर्षी वनडे वर्ल्डकप भारतात खेळला जाणार आहे. त्याचदृष्टीने केएल राहुलही पुढील काही मालिकांमध्ये कशी कामगिरी करतो, याकडे सर्वांचेच लक्ष असणार आहे. केएल राहुल वनडेत भारताचे उपकर्णधारपदही सांभाळतो. त्याचबरोबर त्याने रोहितच्या अनुपस्थितीत अनेकदा भारताचे नेतृत्वही केले आहे.

पण, केएल राहुलचा सध्याचा फॉर्म हा चिंतेचा विषय आहे. तो सातत्यपूर्ण कागिरी करण्यात अपयशी ठरत आहे. पण एकूणच पाहायचे झाल्यास त्याची वनडे क्रिकेटमधील आकडेवारी चांगली आहे.

केएल राहुलने वनडे क्रिकेटमध्ये 45 सामन्यांत 45 च्या सरासरीने 1665 धावा केल्या आहेत. यामध्ये त्याच्या 5 शतकांचा आणि 10 अर्धशतकांचा समावेश आहे.

दरम्यान, अथिया शेट्टी ही भारतीय अभिनेता सुनील शेट्टी यांची मुलगी आहे. आयपीएल 2022 दरम्यान सुनील शेट्टी केएल राहुल कर्णधार असलेल्या लखनऊ सुपरजायंट्स संघाला पाठिंबा देण्यासाठी स्टेडियममध्येही आला होता.