Joshua Da Silva's mother meet Virat Kohli : भारत विरुद्ध वेस्ट इंडिज संघात गुरुवारपासून त्रिनिदादला कसोटी मालिकेतील दुसरा कसोटी सामना सुरु झाला आहे. या सामन्याच्या दुसऱ्या दिवशी भारताचा स्टार फलंदाज विराट कोहलीने शतकी खेळी केली.
दरम्यान, त्याने हा दिवस आणखी एका व्यक्तीसाठी खास बनवला. ही व्यक्ती म्हणजे वेस्ट इंडिजचा यष्टीरक्षक जोशुआ डा सिल्वाची आई.
या सामन्यातील दुसऱ्या दिवसाचा खेळ संपल्यानंतर भारतीय संघ हॉटेलकडे परत जात असताना विराटला जोशुआची आई भेटली. तिने त्याला मिठी मारली आणि तिचा आनंद व्यक्त केला. तसेच विराटनेही तिच्याशी हसून संवाद साधला आणि फोटोही काढला. यावेळी जोशुआ देखील तिच्याबरोबर उपस्थित होता.
जोशुआची आई विराटची मोठी चाहती आहे. त्यांच्यातील हा प्रेमळ गोड क्षण पत्रकार विमल कुमार यांनी टीपला आहे. त्यांनी घेतलेल्या व्हिडिओमध्ये जोशुआच्या आईच्या चेहऱ्यावरील आनंद स्पष्ट दिसत आहे. तसेच तिच्या डोळ्यातून विराटला भेटल्यानंतर आनंदाश्रूही वाहिले.
तिने विराटला भेटल्यानंतर विमल कुमार यांना सांगितले की 'विराट आमच्या काळातील सर्वोत्तम फलंदाज आहे. त्यामुळए माझ्यासाठी त्याला भेटणे हा एक सन्मान होता. माझा मुलगा आणि तो एकाच सामन्यात खेळत आहेत.'
दरम्यान, या सामन्याच्या पहिल्याच दिवशी विराट फलंदाजी करत असताना मागे यष्टीरक्षण करणाऱ्या जोशुआने त्याला त्याच्या आईबद्दल सांगितले होते. त्यांच्यातील संवाद स्टंप माईकमध्ये कैद झाला होता.
जोशुआ विराटला म्हणाला होता की 'माझ्या आईने मला फोन केला आणि सांगितले की ती विराट कोहलीसाठी सामना पाहायला येत आहे. माझा विश्वासच बसत नव्हता.'
विराटसाठी हा सामना अनेक अर्थांनी खास आहे. हा त्याचा कारकिर्दीतील 500 वा सामना आहे. तसेच त्याने या सामन्यात शतकही ठोकले. विराटने भारताकडून पहिल्या डावात 206 चेंडूत 11 चौकारांसह 121 धावा केल्या. हे विराटचे 29 वे कसोटी शतक आणि 76 वे आंतरराष्ट्रीय शतक आहे. तसेच तो 500 व्या आंतरराष्ट्रीय सामन्यात शतक करणारा पहिलाच खेळाडू आहे.
भारताने पहिल्या डावात 128 षटकात सर्वबाद 438 धावा केल्या. या डावात विराटच्या शतकाव्यतिरिक्त रोहित शर्माने 80 धावांची, यशस्वी जयस्वालने 57 धावांची, रविंद्र जडेजाने 61 धावांची आणि आर अश्विनने 56 धावांची खेळी केली. वेस्ट इंडिजकडून केमार रोच आणि जोमेल वॉरिकन यांनी प्रत्येकी 3 विकेट्स घेतल्या.
तसेच दुसऱ्या दिवसाखेर वेस्ट इंडिजने पहिल्या डावात 41 षटकात 1 बाद 86 धावा केल्या आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.