Kolkata Knight Riders vs Royal Challengers Bangalore: इंडियन प्रीमियर लीग २०२३ स्पर्धेत नववा सामना कोलकाता नाईट रायडर्स विरुद्ध रॉयल चॅलेंजर्स बेंगलोर संघात गुरुवारी झाला. ईडन गार्डन्सवर झालेल्या या सामन्यात केकेआरने प्रथम फलंदाजी करताना तब्बल २०४ धावांचा डोंगर उभा केला. केकेआरकडून शार्दुल ठाकूरने तुफानी अर्धशतक केले. त्यामुळे सध्या या सामन्याबद्दल सोशल मीडियावर अनेक मीम्सही व्हायरल होत आहेत.

या सामन्यात आरसीबीने नाणेफेक जिंकून प्रथम गोलंदाजी करण्याचा निर्णय घेतला होता. आरसीबीच्या गोलंदाजांनी सुरुवातीला चांगली गोलंदाजीही करत महत्त्वाच्या विकेट्सही घेतल्या. पण सलामीला आलेल्या रहमानुल्लाह गुरबाजने एकबाजू सांभाळली होती. त्याने ५७ धावांची खेळी केली.

पण तो बाद झाल्यानंतर केकेआरची एकवेळ ५ बाद ८९ धावा अशी अवस्था झाली होती. पण नंतर शार्दुल ठाकूरने दमदार खेळ करत रिंकू सिंगबरोबर ६ व्या विकेटसाठी ४७ चेंडूत १०३ धावांची भागीदारी केली. शार्दुलने २० चेंडूत अर्धशतक पूर्ण करताना आयपीएल २०२३ हंगामातील सर्वात जलद अर्धशतक करण्याचा विक्रमही केला.

शार्दुलने  29 चेंडूत 9 चौकार आणि 3 षटकारांसह 68 धावांची खेळी केली. तसेच रिंकू सिंगने ३३ चेंडूत ४६ धावांची खेळी केली. त्यामुळे केकेआर 20 षटकात 7 बाद 204 धावांपर्यंत पोहचू शकले. विशेष म्हणजे कोलकाताकडून केवळ गुरबाज, रिंकू आणि शार्दुल या तिघांनाच दोन आकडी धावसंख्या पार करता आली. अन्य ४ फलंदाज एक आकडी धावसंख्येवरच बाद झाले.

दरम्यान, शार्दुलच्या या तुफानी खेळामुळे सोशल मीडियावर काही मीम्स व्हायरल होत आहेत. अनेकांनी सोशल मीडियावर प्रतिक्रिया देताना शार्दुलचा त्याच्या टोपननावाचा म्हणजेच 'लॉर्ड'चा उल्लेख केला आहे. तर अनेकांना आरसीबीच्या गोलंदाजीची खिल्ली उडवली आहे.

दरम्यान, हा दोन्ही संघांसाठी या आयपीएल हंगामातील दुसरा सामना होता. केकेआरला त्यांच्या पहिल्या सामन्यात पंजाब किंग्सविरुद्ध पराभवाला सामोरे जावे लागले होते. तसेच आरसीबीने मुंबई इंडियन्सविरुद्ध पहिला सामना खेळताना पराभवाचा सामना केला होता.