भारतीय ऑलिम्पिक असोसिएशन (IOA) ने 28 जुलैपासून बर्मिंगहॅम येथे सुरू होणाऱ्या राष्ट्रकुल खेळांसाठी भारतीय संघाची घोषणा केली आहे. या संघात एकूण 322 सदस्य असणार आहेत. यामध्ये 215 खेळाडू आणि 107 अधिकारी आणि सपोर्ट स्टाफ यांचा समावेश असणार आहे. (Commonwealth Games 2022 News)

बर्मिंगहॅमला जाणार्‍या भारतीय तुकडीची घोषणा करताना IOA सरचिटणीस राजीव मेहता म्हणाले, “आम्ही आमची सर्वात मजबूत तुकडी राष्ट्रकुल खेळांसाठी पाठवत आहोत. नेमबाजीत आम्ही नेहमीच खूप मजबूत होतो. पण यावेळी हा कार्यक्रम या खेळांचा भाग नाही. असे असूनही, गेल्यावेळेच्या तुलनेत यंदा चांगली कामगिरी करण्याचा आम्हाला विश्वास आहे. गेल्या वेळी गोल्ड कोस्टमध्ये राष्ट्रकुल स्पर्धा पार पडल्या होत्या. येथे भारत ऑस्ट्रेलिया आणि इंग्लंडनंतर गुणतालिकेत तिसऱ्या स्थानावर आहे.

* ऑलिम्पिक पदक विजेते देखील भारतीय तुकडीचा भाग आहेत
राष्ट्रकुल स्पर्धेसाठी जाहीर करण्यात आलेल्या भारतीय तुकडीमध्ये ऑलिम्पिक पदक विजेते नीरज चोप्रा (Niraj Chopra , पीव्ही सिंधू(P V Sindhu) , मीराबाई चानू, लोव्हलिना बोरगोहेन यांसारख्या मोठ्या चेहऱ्यांचा समावेश आहे. त्यांच्यासोबत बजरंग पुनिया, रवी कुमार दहिया, मनिका बत्रा, विनेश फोगट, हिमा दास आणि अमित पंघल हे देखील या संघात आहेत. भारतीय बॉक्सिंग फेडरेशनचे (BFI) उपाध्यक्ष राजेश भंडारी यांना भारतीय संघाचे संघप्रमुख बनवण्यात आले आहे.

* भारतीय खेळाडू 15 खेळांमध्ये सहभागी होतील

भारतीय खेळाडू यावेळी 15 खेळ आणि चार पॅरा स्पोर्ट्समध्ये भाग घेणार आहेत. बॉक्सिंग, बॅडमिंटन, वेटलिफ्टिंग आणि कुस्तीमध्ये संघाला आणखी पदके मिळण्याची अपेक्षा आहे. हॉकी आणि महिला क्रिकेटमध्येही चांगल्या कामगिरीची अपेक्षा आहे. कॉमनवेल्थ गेम्स व्हिलेज अधिकृतपणे 23 जुलै रोजी उघडेल. भारतीय संघ येथे पाच वेगवेगळ्या ठिकाणी असेल.