FIH Women's Nations Cup 2022:भारतीय महिला हॉकी संघाने त्यांची विजयी लय कायम राखली आहे. महिला नेशन्स कप 2022 स्पर्धेत भारतीय संघाने बुधवारी दक्षिण आफ्रिका संघाला 2-0 अशा फरकाने विजय मिळवला.

यासह भारताने ग्रुप बी मध्ये सलग तीन विजय आणि 9 गुणांसह अव्वल स्थान मिळवले आहे. त्यामुळे आता भारताचा उपांत्य फेरीत आर्यंलडविरुद्ध सामना होणार आहे. भारताकडून दिप ग्रेस एक्का (14') आणि गुरजीत कौरने (59') प्रत्येकी एक गोल केला. दक्षिण आफ्रिकेच्या एकाही खेळाडूला गोल करता आला नाही.

भारतीय संघाने मागील काही सामन्यांप्रमाणेच या सामन्यातही आक्रमक सुरुवात केली. त्यांनी पहिल्या क्वार्टरमध्ये चेंडूवर सर्वाधिक ताबाही ठेवला होता. त्यामुळे पहिल्याच क्वार्टरमध्ये एक्काने 14 व्या मिनिटाला पहिला गोल नोंदवला आणि भारताचे खाते उघडले.

त्यानंतरही भारताने ही लय कामय राखली. त्यांनी दुसऱ्या क्वार्टरमध्ये दक्षिण आफ्रिकेच्या सर्कलमध्ये अनेकदा प्रवेश केला होता. पण गोलरक्षक ऍनेल वॅन डेवेन्टरने चांगला बचाव केला, त्यामुळे भारतीय खेळाडूंना आघाडी घेण्यात अपयश आले.

तिसऱ्या क्वार्टरमध्येही भारताने चेंडूवर ताबा ठेवला होता. पण या क्वार्टरमध्येही दोन्ही संघांना गोल करता आला नाही. पण शेवटच्या क्वार्टरच्या अखेरीस गुरजीत कौरने गोल करत भारताला आघाडी मिळवून दिली. त्यानंतर दक्षिण आफ्रिका संघाला पुनरागमन करण्याची संधी नव्हती. त्यामुळे भारताने विजयावर शिक्कामोर्तब केले.

भारताचा पुढील सामना 16 डिसेंबर रोजी आयर्लंडविरुद्ध उपांत्य फेरीत होणार आहे. या सामन्याला भारतीय प्रमाणवेळेनुसार रात्री 8.15 वाजता होणार आहे.