India vs Australia: भारत दौऱ्यावर आलेल्या ऑस्ट्रेलिया संघाला एकामागोमाग एक धक्के बसत आहेत. कसोटी मालिकेतील पहिल्या दोन सामन्यात ऑस्ट्रेलियाला पराभव स्विकारावा लागला आहे. त्यातच आता वेगवान गोलंदाज जोश हेजलवूड भारत दौऱ्यातून बाहेर गेला आहे.

हेजलवूड गेल्या अनेक दिवसांपासून टाचेच्या वरच्या भागातील दुखापतीचा सामना करत आहे. हेजलवूडने काही दिवसांपूर्वीच ट्रेनिंगला सुरुवातही केली होती. मात्र, तो अद्यापही या दुखापतीतून सावरलेला नाही. तो या दुखापतीमुळे भारताविरुद्ध पहिल्या दोन्ही कसोटीतही खेळू शकला नव्हता.

आता तो परत मायदेशी परतणार असून सिडनीमध्येच त्याच्या दुखापतीवर काम करणार असल्याचे ऑस्ट्रेलियाचे प्रशिक्षक अँड्र्यू मॅकडोनल्ड यांनी सांगितले आहे.

त्याचबरोबर डेव्हिड वॉर्नरच्या खेळण्यावरही सध्या प्रश्नचिन्ह आहे. त्याला दिल्लीमध्ये दुसरा कसोटी सामना खेळताना दुखापत झाली होती, ज्यामुळे त्याने दुसऱ्या डावात फलंदाजीही केली नव्हती. दुसऱ्या डावात त्याच्याऐवजी मॅट रेनशॉ याने फलंदाजी केली होती.

कमिन्सही परतला मायदेशी

दरम्यान, ऑस्ट्रेलियाचा कर्णधार पॅट कमिन्स त्यांच्या कौटुंबिक कारणामुळे मायदेशी परतणार असल्याचेही सांगण्यात आले आहे. त्याच्या कुटुंबातील सदस्य आजारी असल्याने तो मायदेशी परतणार आहे. मात्र तो भारताविरुद्ध 1 मार्चपासून इंदोरमध्ये सुरू होणाऱ्या तिसऱ्या कसोटीपूर्वी पुन्हा ऑस्ट्रेलियन संघात सामील होईल, अशी अपेक्षा आहे.

ग्रीन-स्टार्क तिसरा कसोटी खेळणार

भारताविरुद्ध पहिल्या दोन कसोटीला मुकलेले कॅमरॉन ग्रीन आणि मिशेल स्टार्क तिसऱ्या कसोटीतून ऑस्ट्रेलिया संघात पुनरागमन करण्याची शक्यता दाट आहे. या दोघांनाही बोटाची दुखापत झाली होती. ज्यामुळे त्यांना पहिल्या दोन कसोटीत खेळता आले नव्हते. पण आता हे दोघेही तिसरा कसोटी सामन्यासाठी सज्ज असल्याचे मॅकडोनल्ड यांनी सांगितले आहे.

याशिवाय टॉड मर्फीलाही छोटी दुखापत आहे, मात्र इंदोर कसोटीपूर्वी तो पूर्ण फिट असेल असेही मॅकडोनल्ड यांनी सांगितले आहे.

ऑस्ट्रेलिया कसोटी मालिकेत पिछाडीवर

सध्या सुरू असलेल्या कसोटी मालिकेत पहिले दोन सामने ऑस्ट्रेलियाने गमावले असल्याने त्यांनी मालिका विजयाची संधीही गमावली आहे. आता त्यांना मालिका वाचवण्यासाठी इंदोरला होणारा तिसरा सामना आणि 9 मार्चपासून अहमदाबादला होणारा चौथा सामना जिंकावा लागणार आहे, नाहीतर त्यांच्यावर मालिका गमावण्याची नामुष्की ओढावेल.