India vs Australia: भारत विरुद्ध ऑस्ट्रेलिया संघात सध्या चार सामन्यांची कसोटी मालिका सुरू असून या मालिकेतील दुसरा सामना 17 मार्चपासून दिल्लीला होणार आहे. यापूर्वी भारतीय संघाचा मुख्य प्रशिक्षक राहुल द्रविडने पत्रकारांशी संवाद साधताना अनेक विषयांवर भाष्य केले. दरम्यान, यात डावखुऱ्या वेगवान गोलंदाजांबद्दलही त्याने प्रतिक्रिया दिली.

पत्रकार परिषदेदरम्यान एका पत्रकाराने द्रविडला भारतीय संघात डावखुऱ्या वेगवान गोलंदाजांची कमी असल्याबद्दल प्रश्न विचारला. यादरम्यान त्याने ऑस्ट्रेलियाच्या मिशेल स्टार्क आणि पाकिस्तानच्या शाहीन शाह आफ्रिदी या गोलंदाजांची उदाहरणे दिली. तसेच त्याने भारताचा माजी वेगवान गोलंदाज आशिष नेहरा आणि इरफान पठाण यांची नावे घेतली.

या प्रश्नावर उत्तर देताना द्रविड म्हणाला, 'डावखुरा वेगवान गोलंदाज अनेक विविधता घेऊन येतो. तुम्ही झहीर खानचे नाव विसरलात. पण निवड समीती आणि संघव्यवस्थापन अशी प्रतिभा असलेल्या खेळाडूंवर लक्ष ठेवून आहे. अर्शदीप सिंगने नुकतीच वनडेमध्ये चांगली कामगिरी केली. त्याने रणजी ट्रॉफीमध्ये खेळताना 4-5 विकेट्सही घेतल्या. तो युवा असून प्रगती करत आहे.'

'त्याच्याशिवाय देखील काही खेळाडू आहेत, जे चांगली कामगिरी करत आहेत. पण फक्त डावखुरा वेगवान गोलंदाज म्हणून भारतीय संघात एखाद्याला संधी मिळणार नाही, त्यासाठी त्याला चांगली कामगिरीही करावी लागेल.'

द्रविड हे उत्तर देत असताना त्या पत्रकाराने त्याला मध्ये थांबवत डावखुरे वेगवान गोलंदाज आपल्या फलंदाजांसमोर अनेकदा आव्हान निर्माण करत असल्याचे सांगितले.

ज्यावर द्रविडने चटकन उत्तर दिले की 'जर तुमच्याकडे 6 फुट 4 इंच उंची असलेला गोलंदाज असेल तर सांगा. तुम्ही मिशेल स्टार्क आणि शाहिन आफ्रिदीचे नाव घेतले. पण भारतात 6 फुट 5 इंचाच्या जवळपास उंची असेलेले डावखुरे वेगवान गोलंदाज खूप क्वचित सापडतात.'

'आम्ही या विभागात लक्ष घालत आहोत. आम्हाला डावखुऱ्या वेगवान गोलंदाजांचे महत्त्व माहिती आहे. पण केवळ तुम्ही डावखुरे वेगवान गोलंदाज असून चालणार नाही, त्यासाठी तुमची कामगिरीही महत्त्वाची आहे. झहीर खान असो किंवा आशिष नेहरा, ते केवळ डावखुरे वेगवान गोलंदाज होते म्हणून त्यांना संधी मिळाली नव्हती, तर ते खरोखर चांगले गोलंदाज होते म्हणून त्यांना संधी देण्यात आलेली.'

दरम्यान, द्रविडने अर्शदीप, खलील अहमद, मुकेश चौधरी अशा काही वेगवान गोलंदाजांची नावेही घेतली, ज्यांवर सध्या लक्ष दिले जात आहे.

भारतीय संघ मालिकेत आघाडीवर

सध्या सुरु असलेल्या कसोटी मालिकेत भारतीय संघ 1-0 अशा आघाडीवर आहे. भारताने नागपूरला झालेल्या पहिल्या कसोटीत ऑस्ट्रेलियाला 1 डाव आणि 132 धावांनी पराभूत केले होते.