India need 257 runs to win against Bangladesh in ICC ODI Cricket World Cup 2023:
वनडे वर्ल्डकप 2023 स्पर्धेत भारत विरुद्ध बांगलादेश सामना गुरुवारी (19 ऑक्टोबर) पुण्यातील महाराष्ट्र क्रिकेट असोसिएशन स्टेडियमवर खेळवला जात आहे. या सामन्यात बांगलादेशने भारतासमोर विजयासाठी 257 धावांचे आव्हान ठेवले आहे.
या सामन्यात बांगलादेशने प्रथम फलंदाजी करताना 50 षटकात 8 बाद 256 धावा केल्या. बांगलादेशकडून सलामीवीर तान्झिद हसन आणि लिटन दास यांनी अर्धशतके केली. तसेच भारताकडून रविंद्र जडेजा, जसप्रीत बुमराह आणि मोहम्मद सिराज यांनी प्रत्येकी 2 विकेट्स घेतल्या. तसेच शार्दुल ठाकूर आणि कुलदीप यादव यांनी प्रत्येकी 1 विकेट घेतली.
या सामन्यात बांगलादेशने नाणेफेक जिंकून प्रथम फलंदाजी करण्याचा निर्णय घेतला होता. बांगलादेशकडून तान्झिद हसन आणि लिटन दास सलामीला फलंदाजी करताना चांगली सुरुवात दिली होती.
या दोघांनीही फटकेबाजी करत शतकी भागीदारीकडे वाटचाल केली होती. तान्झिदने आक्रमक खेळताना अर्धशतकही पूर्ण केले. मात्र, अखेर त्यांची जोडी तोडण्यात कुलदीप यादवला यश मिळाले.
कुलदीपने तान्झिदला 15 व्या षटकात बाद केले. तान्झिदने 43 चेंडूत 5 चौकार आणि 3 षटकारांच्या मदतीने 51 धावा केल्या. दरम्यान, तान्झिद आणि लिटन दास यांच्यात सलामीला 93 धावांची भागीदारी केली. तान्झिद बाद झाल्यानंतरही लिटन दासने आपली लय कायम ठेवली आणि अर्धशतक केले.
मात्र 20 व्या षटकात कर्णधार नजमुल हुसैन शान्तोला रविंद्र जडेजाने 8 धावांवर पायचीत केले, तर 25 व्या षटकात मेहदी हसन मिराजला 3 धावांवर मोहम्मद सिराजने बाद केले, त्याचा शानदार झेल केएल राहुलने घेतला.
त्यापाठोपाठ लिटन दासही 28 व्या षटकात रविंद्र जडेजाविरुद्ध खेळताना शुभमन गिलच्या गोलंदाजीवर झेलबाद झाला. लिटन दासने 82 चेंडूत 7 चौकारांसह 66 धावा केल्या. त्यामुळे बांगलादेशला चांगली सुरुवात मिळूनही त्यांची धावगती मंदावली.
दरम्यान, नंतर तौहिद हृदोय आणि मुश्फिकुर रहिम यांनी डाव सावरला होता. त्यांच्यात 42 धावांची भागीदारीही झाली. पण ही भागीदारी आणखी धोकादायक ठरण्यापूर्वीच हृदोयला शार्दुल ठाकूरने 16 धावांवर माघारी धाडले, तर जसप्रीत बुमराहने मुश्फिकुर रहिमला रविंद्र जडेजाच्या हातून झेलबाद केले.
यानंतरही महमुद्दुलाह आणि नसूम अहमद यांनी झुंज दिली. मात्र, नसूमला 14 धावांवर सिराजने बाद केले, तर महमुद्दुलाह 46 धावांवर बुमराहच्या गोलंदाजीवर अखेरच्या षटकात त्रिफळाचीत झाला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.