Shreyas Iyer, IND vs SL: भारतीय संघाचा आक्रमक फलंदाज श्रेयस अय्यर श्रीलंकेविरुद्ध फॉर्ममध्ये परतला. त्याने 56 चेंडूत 82 धावांची तूफानी खेळी खेळली. 2023 च्या विश्वचषकातील हे त्याचे दुसरे अर्धशतक होते. अय्यरने या डावात एकच नाही तर अनेक पराक्रम केले.

त्याने 2023 च्या विश्वचषकातील सर्वात लांब षटकार ठोकला. वनडेमध्ये 2000 धावा पूर्ण केल्या. इतकंच नाही तर 40 वर्षांपूर्वी कपिल देव यांनी एक पराक्रमही केला होता. आम्ही बोलतोय त्या भारतीय खेळाडूंबद्दल ज्यांनी एकदिवसीय विश्वचषकाच्या एका सामन्यात सर्वाधिक षटकार ठोकले होते.

दरम्यान, श्रेयस अय्यरने (Shreyas Iyer) 82 धावांच्या खेळीत एकूण 6 षटकार ठोकले. कपिल देव यांनी 1983 च्या विश्वचषकात झिम्बाब्वेविरुद्ध एका डावात सहा षटकार ठोकले होते. हे 40 वर्षांपूर्वी घडले होते. मात्र, रोहित शर्मानेही या विश्वचषकाच्या एका सामन्यात पाकिस्तानविरुद्ध सहा षटकार ठोकले. या यादीत सौरव गांगुली आणि युवराज सिंग आघाडीवर आहेत.

एकदिवसीय विश्वचषकातील एका डावात सर्वाधिक षटकार मारणारे भारतीय

7 – सौरव गांगुली विरुद्ध श्रीलंका, टॉंटन (1999)

7 – युवराज सिंग विरुद्ध बर्म्युडा, पोर्ट ऑफ स्पेन (2007)

6 – कपिल देव विरुद्ध झिम्बाब्वे, टुनब्रिज वेल्स (1983)

6 – रोहित शर्मा विरुद्ध पाकिस्तान, अहमदाबाद (2023)

6 – श्रेयस अय्यर विरुद्ध श्रीलंका, मुंबई- वानखेडे, (2023)

टीम इंडियाने मोठी धावसंख्या उभारली

भारतीय संघाच्या कामगिरीबद्दल बोलायचे झाल्यास, शुभमन गिलने सर्वाधिक 92 धावा केल्या. तर विराट कोहलीने (Virat Kohli) 88 धावांची शानदार खेळी करत पुन्हा एकदा आपला फॉर्म दाखवला. यानंतर श्रेयस अय्यरच्या 56 चेंडूत 82 धावांची शानदार खेळी आणि रवींद्र जडेजाच्या 35 धावांच्या जोरावर भारताने 357 धावांची मोठी धावसंख्या उभारली.

या सामन्यापूर्वी भारतीय संघाने सलग सहा विजयांची नोंद केली होती. गोलंदाजीत जसप्रीत बुमराहने पहिल्या चेंडूवर पहिली विकेट घेतली. त्यानंतर मोहम्मद सिराजने पहिल्या दोन षटकांत तीन बळी घेतले.