ICC ODI Cricket World Cup 2023 India vs Afghanistan Playing XI:

वनडे वर्ल्डकप 2023 स्पर्धेत बुधवारी भारत विरुद्ध अफगाणिस्तान संघात सामना रंगणार आहे. हा सामना दिल्लीतील अरुण जेटली क्रिकेट स्टेडियमवर खेळला जात आहे. या सामन्यात अफगाणिस्तानने नाणेफेक जिंकली असून प्रथम फलंदाजी करण्याचा निर्णय घेतला आहे.

या सामन्यासाठी भारतीय संघाने मोठा बदल केला आहे. अनुभवी फिरकीपटू आर अश्विनच्या जागेवर प्लेइंग इलेव्हनमध्ये शार्दुल ठाकूरला संधी देण्यात आली आहे. तसेच या सामन्यासाठीही शुभमन गिल उपलब्ध नसल्याने इशान किशन सलामीला फलंदाजी करेल.

त्याचबरोबर नाणेफेकीवेळी रोहितने म्हटले आहे की भारतीय संघाने प्रथम गोलंदाजी करण्याचेच ठरवले होते. त्यामुळे ते खूश आहेत की अफगाणिस्तानने प्रथम फलंदाजी घेतली. तसेच त्याने आशा व्यक्त केली की पहिल्या सामन्यात ऑस्ट्रेलियाविरुद्ध ज्याप्रामाणे विजय मिळवला त्याप्रमाणे या सामन्यातही विजय मिळेल.

दरम्यान, अफगाणिस्तानने त्यांच्या प्लेइंग इलेव्हनमध्ये कोणताही बदल केलेला नाही. त्यामुळे त्यांचा बांगलादेशविरुद्ध पहिल्या सामन्यात खेळलेला संघच या सामन्यातही खेळणार आहे.

बुधवारी होणारा सामना भारत आणि अफगाणिस्तान या दोन्ही संघांसाठी यंदाच्या स्पर्धेतील दुसरा सामना आहे. पहिल्या सामन्यात भारताने ऑस्ट्रेलियाला पराभूत केले होते, तर अफगाणिस्तानला बांगलादेशकडून पराभवाचा धक्का बसला होता.

असे आहेत प्लेइंग इलेव्हन -

• भारत - रोहित शर्मा (कर्णधार), इशान किशन, विराट कोहली, श्रेयस अय्यर, केएल राहुल (यष्टीरक्षक), हार्दिक पंड्या, रवींद्र जडेजा, शार्दुल ठाकूर, कुलदीप यादव, जसप्रीत बुमराह, मोहम्मद सिराज

• अफगाणिस्तान - रहमानउल्ला गुरबाज(यष्टीरक्षक), इब्राहिम झद्रान, रहमत शाह, हशमतुल्ला शाहिदी(कर्णधार), नजीबुल्ला झद्रान, मोहम्मद नबी, अजमातुल्ला ओमरझाई, रशीद खान, मुजीब उर रहमान, नवीन-उल-हक, फजलहक फारुकी