ICC Cricket World Cup 2023, Ahmedabad's hotel Price: वर्ल्डकप 2023 स्पर्धेचे वेळापत्रक आंतरराष्ट्रीय क्रिकेट परिषदेने मंगळवारी (27 जून) घोषित केले आहे. ही स्पर्धा 5 ऑक्टोबर ते 19 नोव्हेंबर अशी 46 दिवस भारतात होणार आहे. आता या स्पर्धेसाठी 100 दिवसच राहिले आहेत. त्यामुळे क्रिकेट चाहत्यांनी सामने पाहाण्याच्या योजना आखण्यास सुरुवात केली आहे.

या स्पर्धेतील इंग्लंड विरुद्ध न्यूझीलंड संघातील पहिला सामना आणि अंतिम सामना अहमदाबादमधील नरेंद्र मोदी स्टेडियवर होणार आहे. तसेच भारत विरुद्ध पाकिस्तान हा हायव्होल्टेज सामना देखील याच स्टेडियमवर होणार आहे. त्यामुळे अहमदाबादमधील सध्या हॉटेलच्या किमती गगनाला भिडल्या आहेत.

वर्ल्डकप 2023 स्पर्धेसाठी 100 पेक्षाही कमी दिवस राहिल्याने केवळ भारतातीलच नाही, तर जगभरातील क्रिकेट चाहत्यांनी सामन्यांबरोबरच पर्यटनाचाही आनंद घेण्याच्या दृष्टीने योजना आखण्यास सुरुवात केली आहे. त्याचमुळे आता हॉटेल्समधील रुम्सचेही स्पर्धेच्या काळातील बुकिंग होणे सुरू झाले आहे.

मीडियातील रिपोर्ट्सनुसार अहमदाबादमधील फाईव्ह स्टार हॉलेटमधील साधारण रुमचे भाडे स्पर्धेच्या काळात एका रात्रीसाठी 50 हजाराच्या आसपास आहे. या रुम्सचे भाडे सामान्यवेळी साधारण 6 हजार ते 11 हजार रुपयांपर्यंत असते.

टाईम्स ऑफ इंडियाने दिलेल्या वृत्तानुसार अहमदाबादमधील आयटीसी नर्मदा हॉटेलचे जनरल मॅनेजर किनम मॅकेन्झी यांनी माहिती दिली आहे की भारत - पाकिस्तान सामन्यादरम्यानच्या काळातील बुकिंग जवळपास पूर्ण झाले आहेत. तसेच अन्य सामन्यांदरम्यानही जवळपास सर्व रुम्सचे बुकिंग पूर्ण होऊ शकते.

त्याचबरोबर हयात रेजेन्सी हॉटलचे जनरल मॅनेजर पुनित बैजल यांनीही सामन्यांच्या काळातील जवळपास 80 टक्के रुम्स बुक झाल्याचे सांगितले आहे. तसेच त्यांनी सांगितले आहे की इंग्लंडमधील आणि इतर ट्रॅव्हल एजन्सींनी बुकिंग आधीच करून ठेवले आहेत.

तसेच सुत्रांनुसार बेस कॅटेगरीच्या रुमसाठी जवळपास 52 हजार रुपये, तर प्रीमियर कॅटेगरीसाठी साधारण 1 लाख रुपये इतके रुमचे भाडे आहे. त्याचबरोबर फोर स्टार असलेल्या हॉटेलमध्येही रुमचे भाडे जवळपास 20 हजाराच्या पुढे आहे.

दहा शहरात होणार सामने

वर्ल्डकप 2023 मधील सामने हैदराबाद, अहमदाबाद, धरमशाला, दिल्ली, चेन्नई, लखनऊ, पुणे, बंगळुरू, मुंबई आणि कोलाकाता या 10 शहरांमध्ये होणार आहेत.

तसेच गुवाहाटी, तिरुअनंतपुरम आणि हैदराबाद येथे 29 सप्टेंबर ते 3 ऑक्टोबर दरम्यान सराव सामने होतील. त्यामुळे अहमदाबादशिवाय या शहरांमध्येही ऑक्टोबर-नोव्हेंबर दरम्यान मोठ्या प्रमाणात पर्यटक येण्याची शक्यता आहे.