ISL Football: स्पॅनिश बचावपटू मार्क व्हालिएंते दुखापतीमुळे इंडियन सुपर लीग (आयएसएल) फुटबॉल स्पर्धेच्या बाकी मोसमास मुकल्यानंतर एफसी गोवा संघाने त्याच्या जागी स्पेनच्याच हर्नन सांताना याची निवड केली आहे.

एफसी गोवा संघाने करारबद्ध करण्यापूर्वी ३२ वर्षीय सांताना चीनमधील लीग-वन स्पर्धेत सिचुआन जिऊनिऊ संघातर्फे खेळत होता. एफसी गोवाचे माजी प्रशिक्षक सर्जिओ लोबेरा या संघाचे प्रशिक्षक असून त्यांना आठवा क्रमांक मिळाला होता.

सांताना आता चीनमधून गोव्यात दाखल झाला. ‘‘एफसी गोवा संघाने संधी दिल्याबद्दल मी त्यांचा आभारी आहे. एफसी गोवाला भारतातील सर्वोत्तम संघांत गणले जाते. त्यामुळे त्यांच्याकडून खेळण्याबाबत विचारणा झाल्यानंतर मी लगेच होकार दिला,’’ असे सांताना याने करारपत्रावर सही केल्यानंतर सांगितले.

एफसी गोवाचे फुटबॉल संचालक रवी पुस्कुर यांनी सांतानाचे संघात स्वागत केले. ‘‘तो सेंटर बॅक खेळाडू असला तरी मध्यफळीतील नियंत्रण राखू शकतो. त्याच्या निवडीमुळे संघात पर्याय उपलब्ध झाला आहे,’’ असे रवी म्हणाले.

हर्नन सांताना याची कारकीर्द

स्पेनमधील यूडी लास पाल्मास संघात जडणघडण, २०१० या संघाच्या राखीव संघात पदार्पण

२०११ पासून लास पाल्मास संघाच्या सीनियर संघाचे सात मोसम प्रतिनिधित्व, २०१५ मध्ये ला-लिगासाठी पात्रता

सांतियागो बेर्नाब्यू येथे वलयांकित रेयाल माद्रिदविरुद्ध सांतानाचा एकमेव ला-लिगा गोल

२०१९-२० मध्ये आयएसएल स्पर्धेतील मुंबई सिटीशी लोन करार

मुंबईतील संघातर्फे आयएसएल लीग विनर्स शिल्ड व आयएसएल करंडकाचा मानकरी, २३ सामन्यांत २ गोल

२०२१ मध्ये आयएसएलमधील गुवाहाटीच्या नॉर्थईस्ट युनायटेड संघाशी करार, काही सामन्यांत संघाचे नेतृत्व

गतमोसमात चीनमधील सिचुआन जिऊनिऊ संघात दाखल