National Senior Women's Football Tournament: राष्ट्रीय सीनियर महिला फुटबॉल स्पर्धेची मुख्य फेरी गाठण्यासाठी प्रयत्नशील असलेल्या गोव्याच्या संघाला बुधवारी जोरदार धक्का सहन करावा लागला.

गट तीनमध्ये हिमाचल प्रदेशने एकतर्फी लढतीत 4-0 असा चमकदार विजय नोंदविला. फातोर्डा येथील पंडित जवाहरलाल नेहरू स्टेडियमवर सामना झाला.

या गटातील आणखी एका सामन्यात ओडिशाने राजस्थानचा 12-0 असा धुव्वा उडवून अव्वल स्थान मिळविले. ओडिशाचे आता तीन लढतीनंतर दोन विजय व एका बरोबरीसह सात गुण झाले आहेत.

राजस्थानला सलग तिसरा पराभव पत्करावा लागला. ओडिशाच्या विजयात जसोदा मुंडा हिने चार, मालती मुंडा व बान्या कबिराज यांनी प्रत्येकी दोन, निकेता बिशी, भारती दास, श्रीजना तमांग व सुमित्रा हेमब्रम यांना प्रत्येकी एक गोल केला.

मागील लढतीत दोन गोलच्या पिछाडीवरून ओडिशाला 3-3 असे गोलबरोबरीत रोखलेल्या हिमाचल प्रदेशने बुधवारी सकाळी गोव्याला निष्प्रभ केले. रिया शर्मा हिने 11 व्या मिनिटास केलेल्या गोलमुळे विश्रांतीला हिमाचलचा संघ एका गोलने आघाडीवर होता.

नंतर उत्तरार्धात निशा हिने 50 व्या, रितू देवी हिने 67 व्या, तर अंजू हिने 81 व्या मिनिटास केलेल्या गोलमुळे हिमाचल प्रदेशने स्पर्धेतील पहिल्या विजयाची नोंद केली. अन्य एका बरोबरीमुळे त्यांचे दोन लढतीतून चार गुण झाले आहेत.

अगोदरच्या लढतीत राजस्थानला तीन गोलने नमविलेल्या गोव्याचा हा पहिला पराभव ठरला. त्यामुळे त्यांचे दोन सामन्यानंतर तीन गुण कायम राहिले.