पणजी : मुख्यमंत्री प्रमोद सावंत यांच्याकडे दोन सरकारी वाहने आहेत; परंतु सर्वाधिक किमतीचे वाहन वाहतूकमंत्री माविन गुदिन्हो यांच्याकडे आहे. त्यांच्याकडे 36 लाख 35 हजार रुपये किमतीची ‘एमजी ग्लेस्टर’ आहे. त्या खालोखाल मुख्यमंत्र्यांकडे 35 लाख 24 हजार रुपये किमतीची फॉर्च्युनर व 24 लाख 77 हजार रुपयांची ‘इनोव्हा क्रेस्टा’ ही वाहने आहेत.

मंत्र्यांकडे असणाऱ्या वाहनांविषयी सरकारने माहिती जारी केली आहे. सर्वांत जास्त किमतीचे वाहन गुदिन्हो यांना 24 मार्च 2021 मध्ये मिळाले. त्यांच्या ‘एमजी ग्लेस्टर या वाहनाची सध्याची किंमत 38 लाख रुपये आहे. मुख्यमंत्र्यांकडे असलेली इनोव्हा क्रेस्टा 2 जुलै 2021 मध्ये, तर फॉर्च्युनर नोव्हेंबर 22 मधील आहे.

वीजमंत्री सुदिन ढवळीकरांकडे 34 लाख 50 हजारांची फॉर्च्युनर आहे. कला व संस्कृती मंत्री गोविंद गावडे यांच्याकडे जीप मेरिडियान हे 32 लाख 40 हजार रुपये किमतीचे वाहन आहे. मच्छिमार खात्याचे मंत्री नीळकंठ हळर्णकर यांच्याकडे किया कार्निवल (30 लाख 99 हजार रुपये); कृषिमंत्री रवी नाईक यांच्याकडे 26,72,500 रुपये किमतीची इनोव्हा क्रेस्टा आली. त्यापूर्वी 16 जून 2022मध्ये ॲडव्होकेट जनरल देविदास पांगम यांना 26,66,500 रुपये किमतीची इनोव्हा क्रेस्टा देण्‍यात आली.