FIFA World Cup: कतारमध्ये 20 नोव्हेंबरपासून फुटबॉल विश्वचषक खेळला जात आहे. सध्या गट फेरीचे सामने सुरु आहेत. सामन्यापेक्षा हा विश्वचषक वेगवेगळ्या प्रकारच्या वादांमुळे चर्चेत आहे. आता आणखी एका गोष्टीने आयोजकांना त्रास दिला आहे. विश्वचषकासाठी बांधण्यात आलेल्या स्पोर्ट्स व्हिलेजजवळ (फॅन व्हिलेज) आग लागली. देशातील सर्वात मोठ्या लुसेल स्टेडियमजवळ ही घटना घडली.

दरम्यान, सोशल मीडियावर (Social Media) व्हायरल झालेल्या फोटोमध्ये आग लागल्यानंतर आकाशात धुराचे लोट दिसत आहे. याबाबत अधिकाऱ्यांनी सांगितले की, शहरातील एका बांधकाम सुरु असलेल्या इमारतीला आग लागली आहे. त्यावर नियंत्रण आणले आहे. कोणतीही दुखापत झाल्याचे वृत्त नाही.

दुसरीकडे, धुराचे लोट स्पोर्ट्स व्हिलेजकडे गेल्यावर गोंधळाचे वातावरण निर्माण झाले. लोक आपापल्या जागेवरुन पळू लागले. मात्र, पोलीस दलाने त्यांना आग मोठी नसल्याचे सांगितले. अधिकाऱ्यांनी सांगितले की, लुसेल शहराचा भाग असलेल्या एका बेटावर स्थानिक वेळेनुसार दुपारनंतर आग लागली. लुसेल या स्पर्धेदरम्यान अनेक सामने आयोजित करत आहे. येथेच शनिवारी रात्री उशिरा अर्जेंटिनाचा (Argentina) सामना मेक्सिकोशी होणार आहे. लुसेल स्टेडियमपासून आग सुमारे 3.5 किलोमीटर (2 मैल) होती.