पणजी : गोवा प्रोफेशनल लीग फुटबॉल स्पर्धेत (Goa Pro League) एफसी गोवा व स्पोर्टिंगक्लब द गोवा संघाने प्रत्येकी एक गुण विभागून घेतला. त्यांच्यात म्हापसा येथील धुळेर स्टेडियमवर गुरुवारी झालेली लढत १-१ गोलबरोबरीत राहिली.

एफसी गोवाने ३५व्या मिनिटास आघाडी घेतली. व्हेलरॉय फर्नांडिसने प्रतिस्पर्धी गोलरक्षकास चकवा देत संघाचे गोल खाते उघडले, मात्र त्याला चार मिनिटानंतर पुन्हा अचूक नेमबाजी करता आली नाही. विश्रांतीला एफसी गोवा संघ एका गोलने (Goal) आघाडीवर होता. गतविजेत्या स्पोर्टिंगने तासाभराच्या खेळात बरोबरी साधली. रोहित तोताड याने एफसी गोवाचा गोलरक्षक हॅन्सेल कुएल्हो जाग्यावर नसल्याची संधी साधली. उत्तरार्धातील खेळात बचावफळीतील दिशांक कुंकळीकर याला झालेली दुखापतही एफसी गोवाला महागात पडली.

सामन्याच्या सातव्याच मिनिटास ब्रायसन फर्नांडिसच्या असिस्टवर मेव्हन डायस याचा नेम चुकला, त्यामुळे सुरवातीलाच स्पोर्टिंगवर दबाव टाकणे एफसी गोवा (FC Goa) स शक्य झाले नाही. त्यांच्या डेल्टन कुलासो यानेही आक्रमक खेळ केला, पण सदोष नेमबाजीचा फटका बसला.