पणजी: अखिल भारतीय बुद्धिबळ महासंघाच्या (All India Chess Federation) नैतिकता आयोगाने गोवा बुद्धिबळ संघटनेच्या (Goa Chess Association) निवडणूक (Election) प्रक्रियेस दणका दिला आहे. या प्रकरणी पुढील सुनावणी 28 ऑगस्ट रोजी होणार असून तोपर्यंत कार्यकारी समिती निवडणूक निकाल जाहीर करण्यास आयोगाने स्थगिती दिली आहे.

गोवा बुद्धिबळ संघटना कार्यकारी समिती निवडणूक निर्णय अधिकारी सुभाष बी. शिरोडकर यांनी 10 ऑगस्ट रोजी संघटनेची समिती बिनविरोध ठरल्याचे जाहीर केले होते. या प्रक्रियेस महेश कांदोळकर (तिसवाडी), आशेष केणी (सासष्टी तालुका), विश्वास पिळर्णकर (बार्देश तालुका) व अमोघ नमशीकर (फोंडा तालुका) यांनी आक्षेप घेत अखिल भारतीय बुद्धिबळ महासंघाच्या नैतिकता आयोगाकडे तक्रार नोंदविली होती. ते अनुक्रमे अध्यक्ष, सचिव, खजिनदार व संयुक्त सचिव पदाचे उमेदवार आहेत.

या तक्रारीची दखल घेत महासंघाच्या नैतिकता आयोगाने निवडणूक निर्णय अधिकाऱ्यास प्रतिवादी ठरविले आहे. नैतिकता आयोगाच्या निर्णयाची माहिती शुक्रवारी तिसवाडी तालुका बुद्धिबळ संघटनेचे खजिनदार आणि गोवा बुद्धिबळ संघटनेच्या निवडणुकीत उत्तर गोवा विभागीय उपाध्यक्षपदी बिनविरोध ठरलेले अरविंद म्हामल यांनी दिली.

महासंघाच्या नैतिकता आयोगाने या प्रकरणी प्रतिवादी आणि गोवा बुद्धिबळ संघटनेस पुढील सुनावणीपर्यंत (ता. 28 ऑगस्ट) दस्तऐवज सादर करण्यासंबंधी नोटीस बजावली आहे. गोवा बुद्धिबळ संघटनेची आमसभा 22 ऑगस्ट रोजी होणार आहे, त्यावेळी निवडणूक निकाल जाहीर करू नयेत आणि कार्यभार सोपवू नये असे नैतिकता आयोगाने आदेशात बजावले आहे.

नैतिकता आयोगाचे आदेशातील म्हणणे...

- निवडणूक निर्णय अधिकाऱ्यांनी 5 ऑगस्ट 2021 रोजी उमेदवारी अर्ज छाननीच्या दिवशी अर्ज नाकारण्यात आलेल्या उमेदवारांचे अर्ज स्वीकारले, पण अर्ज मागे घेण्याच्या दिवशी अर्ज नाकारण्याचा चुकीचा निर्णय देत प्रतिस्पर्ध्यांना बिनविरोध जाहीर केले.

- निवडणूक निर्णय अधिकाऱ्याने तक्रार दाखल केलेल्यांचे उमेदवारी अर्ज नाकारून चूक केली आहे हे प्रथमदर्शनी स्पष्ट होते. 5 ऑगस्ट रोजी संध्याकाळी 6 वाजल्यापासून 10ऑगस्टपर्यंत उमेदवारी अर्ज कोणत्याही आधारावर नाकारले जाऊ शकत नाहीत, त्यामुळे प्रथमदर्शनी निवडणूक निर्णय अधिकाऱ्याने जाहीर केलेला निकाल कायद्याच्या दृष्टीने चुकीचा आहे.

- 8 जानेवारी 2017 तारखेपूर्वी अथवा नंतरच्या गोवा बुद्धिबळ संघटनेच्या दुरुस्तीनुसार प्रत्येक तालुक्यातून फक्त एक प्रतिनिधी पदाधिकारी पदासाठी निवडणूक लढवू शकतो असे नमूद नाही.